Cebu Greats naglaraw sa solo nga liderato
Mo-host sa Biñan Tatak Gel sa Hoops Dome karong gabii
CEBU, Philippines — Ang Cebu Greats MJAS Zenith Trading nagtinguha nga solong liderato sa South Division sa dihang ilang sangkaon ang Biñan Tatak Gel sa una sa duha ka sagunson nilang home games sa SportsPlus Maharlika Pilipinas Basketball League (MPBL) Season 8 karong adlawa (Huybes, Hulyo 16) didto sa Hoops Dome sa siyudad sa Lapu-Lapu.
Magsugod ang ilang engkwentro sa alas-6 sa gabii, human sa alas-4 sa hapon nga pasiunang sangka tali sa Batangas City Tanduay Athletics ug Basilan Steel.
Gikan sa mainit nga pito ka duwa nga ratsada, ang Cebu kausa lamang mapildi sa miagi nilang 13 ka duwa aron duyogan ang Gensan Warriors sa kinatas-ang dapit sa South standing bitbit ang parehong 14-3 win-loss rekords.
Ang Greats mosuway pagbuak sa maong panagtabla sa dihang ilang harongon ang Biñan sa una nilang home game sukad ilang gibuntog ang Gensan, 72-66, sa Aznar Coliseum pito ka tuig na ang milabay.
Ang way pagbahar nga si Dondon Hontiveros gipaabot nga maoy modala sa away alang sa mga Sugbuanon uban sa anak niyang si Ice ug mga homegrown players nga naglangkob nilang JR Quiñahan, Andrey Armenion, Ron Dennison, JJ Gesalem, Brylle Meca, Elmer Echavez, Kint Ariar, ug Dolan Adlawan.
Si coach Junthy Valenzuela makalaum sab nilang Jun Manzo, Mark Meneses, Ichie Altamirano, Dhon Reverente, Simon Camacho, CJ Payawal, Alvin Baetiong, ug Aldrin Morante sa ilang laraw nga ipadayon ang impresibo nilang salida atubangan sa ilang mga fans.
Bisan og puno sa kadasig kay mokumbati sa ilang korte, ang Greats angayan nga mangandam alang sa usa ka malisud nga hagit batok sa Biñan, nga gibandera sa mga kanhi PBA players nga sila si Jean Marc Pingris, Carlo Lastimosa, ug Nino Canaleta, kanhi UST King Tiger Nic Cabañero, ug mga kanhi bitoon sa CESAFI nga sila si Kenny Rogers Rocacurva, Michael Maestre, ug Popoy Actub.
Human sa Biñan, nga ikaupat karon sa South uban ang 13-3 nga baraha, ang Cebu mosakbang sunod batok sa Batang Kankaloo karong Sabado, Hulyo 18, sa Cebu Coliseum.
- Latest
