Coach Jimmy, NLEX 3-0 na
CEBU, Philippines — Si coach Jimmy Alapag ug ang NLEX Road Warriors mikastigo sa Titan Ultra Giant Risers, 135-100, alang sa ikatulo nilang sagunson nga daog sa PBA Governors' Cup niadtong Martes sa gabii didto sa Ynares Center-Antipolo.
Si Schonny Winston mikadlit og career-high nga 30 puntos alang sa Road Warriors, nga milampaso sa Giant Risers, 38-18, sa katapusang kuwarter aron demolison ang Giant Risers.
Si Robert Bolick midugang og 29 puntos samtang si DeQuan Jones mitali og 22 puntos alang sa NLEX. Nadoble ang kalipay ni Alapag gumikan kay nahimo siyang unang rookie coach nga nagasugod og 3-0 sa usa ka komperensiya sukad ni Chris Gavina sa Rain or Shine niadtong 2021.
Samtang ang Titan nasugamak sa ikatulo nilang sagunson nga pildi bisan pa'g nakakuha og 27 puntos ug 10 ka rebounds sa bag-o nilang import nga si Tirrell Brown.
Sa laing bahin, bisa'g wala sila si coach Leo Austria ug June Mar Fajardo ang San Miguel Beer nakamaneho gihapon paglampaso sa Macau Golden Pandas, 123-109.
Sila si George King, CJ Perez, Jericho Cruz, ug Rodney Brondial ang mibandera sa Beermen sa una nilang daog.
Si King mihimo og impresyon sa iyang SMB debut uban ang 30 puntos, lima ka rebounds ug pito ka assists.
Sila si Perez ug Cruz nagkumboya'g 41 puntos, si Jerrick Ahanmisi mi-iskor og 16 samtang si Brondial milangkat og 25 ka rebounds nga midayan-dayan sa iyang 10 puntos.
- Latest
