P170K nga shabu ug walay lisensyang pusil nasakmit

CEBU, Philippines — Usa ka 35-anyos nga lalaki ang nadakpan sa mga operatiba sa Regional Police Drug Enforcement Unit-7 (RPDEU-7) atol sa buy-bust operation sa F. Vestil Street, Barangay Mambaling, Cebu City, kadlawon sa adlaw nga Miyerkules, Hulyo 15, 2026.

Ang suspetsado giila nga si John Edgar Manumbaga Opoc Jr., alyas "John," residente sa Puntod Alaska, Barangay Mambaling.

Sumala sa kapolisan, sulod sa usa ka semana nga surveillance ilang gibantayan ang kalihokan sa suspetsado sa wala pa ipahigayon ang buy-bust operation.

Giingon usab sa mga imbestigador nga gibanabana nilang 25 gramos nga shabu matag semana ang iyang mabaligya diha sa Barangay Mambaling ug mga kasikbit nga barangay.

Nasikop ang suspetsado human siya mibaligya og gidudahang shabu ngadto sa usa ka police poseur-buyer. Gikan kaniya narekober ang lima ka pakete sa gidudahang shabu nga adunay kinatibuk-ang gibug-aton nga 25 gramos ug gibana-bana ang kantidad nga P170,000.

Nakuha usab sa operasyon ang marked buy-bust money, usa ka itom nga sling bag nga sudlanan sa ilegal nga droga, ug usa ka 9mm Taurus Black Widow nga revolver nga adunay tulo ka buhing bala.

Dugang pa sa kapolisan, giingong usa ka binilanggo sa usa Jail Facility ang tinubdan sa ilegal nga droga sa suspetsado.

Padayon pa ang ilang imbestigasyon aron mailhan ang ubang posibleng nalambigit sa maong ilegal nga kalihokan.

Gibutyag usab sa mga awtoridad nga ang suspetsado nakagawas lamang sa prisohan niadtong 2025 human mapriso sulod sa walo ka bulan tungod sa kasong paglapas sa Republic Act 10591 o ang Comprehensive Firearms and Ammunition Regulation Act.

Ang suspetsado nag-atubang karon og mga kaso sa paglapas sa Sections 5 ug 11, Article II sa Republic Act 9165 o Comprehensive Dangerous Drugs Act of 2002, ingon man sa Republic Act 10591 tungod sa giingong ilegal nga pagpanag-iya og armas.  (BANAT NEWS)