Amerikanong marine biologist gipatay

CEBU, Philippines — Amerikanong marine biologist nga nakatabang og dako sa Pilipinas nga mabutang isip center of global marine biodiversity ang gipusil patay sa sulod sa iyang balay sa Negros Oriental adtong Domingo sa gabii, Hulyo 12.

Sumala pa sa report, ang biktima nga si Kent Carpenter,  73- anyos, usa ka adjunct professor sa Silliman University Institute of Environmental and Marine Sciences sa Dumaguete City. 

Sumala pa sa gipagawas nga pamahayag sa Police Regional Office Negros Island Region (PRO NIR) kagahapon, Martes,  tulo ka wala mailhing mga lalaki ang pugsanong nisulod sa pinuy-anan ni Carpenter sa Barangay Ajong, Sibulan mga alas 11:30 p.m. adtong Domingo.

Ang biktima ug kaubang Pinoy nga 34-anyos gikatahong nagtan-aw og telebisyon anang tungora sa dihang nahitabo ang krimen.

Matud pa usa sa mga lalaki nga armado og mubo nga armas ug diretsong gipusil ang biktima sa ulo nga niresulta sa iyang kamatayon.

Naangol sab ang iyang kauban ug kasamtangang nagpaalim sumala pa sa kapolisan. Padayun pang gipangita sa kapolisan kung kinsa ang mga mamumuno ug wala pa silay gipagawas nga impormasyon may kalabotan sa motibo sa maong krimen.

Gi-activate na sa PRO-NIR ang usa ka special investigation task group para motutok sa imbestigasyon ug pagpangita sa mga nalambigit niini ug motibo.

Sa pagkakaron nag-backtracking na ang mga imbestigador kung naay nakakuha og CCTV footage, mga testigo,  ug uban pa nga makatabang sa kaso.

 “We strongly condemn this senseless act of violence. I have directed our investigators to exhaust all legal means to identify and apprehend those responsible at the soonest possible time,"  sumala pang Regional Director PBGen. Romano Cardiño sa usa ka pamahayag.

Si Carpenter usa inila nga ichthyologist (zoologist nga eksperto sa pagtuon sa mga isda)  nga nakahatag og daghang kontribusyo sa marine conservation sa tibuok kalibotan.

Apan ang iyang gihatagan og special nga interes mao ang Pilipinas, kapin 50 ka tuig siyang nag-research sa mga marine fishes sa Pilipinas sugod pa niadtong 1975.

Co-author siya sa 2005 study nga nag-ila sa Verde Island Passage isip mao ang "center of marine shore fish biodiversity." Ang iyang findings nakapakusog sa global marine science standing sa Pilipinas.  Usa sab siya sa mga nangusog nga maapil sa listahan sa World Heritage Site ang Verde Island Passage.

Daghan ang gianugonan sa iyang kamatayon tungod sa kadako sa kontribusyong iyang nahatag para sa Pilipinas. Gikan sa Philstar.com, IBM BANAT NEWS