Tabang alang sa mga barangay gipagawas na

CEBU, Philippines — Nagsugod na sa pagdawat og tabang pinansyal ang 80 ka barangay sa Dakbayan sa Sugbo human mapagawas sa nasudnong kagamhanan ang tseke nga nagkantidad og ?16 milyones ngadto sa account sa lokal nga kagamhanan.

Pormal nga gidawat ni Mayor Nestor Archival uban ni Liga ng mga Barangay (LnB)–Cebu City President Franklyn Ong ang tseke gikan sa Office of the President's Socio Civic Projects Fund.

Human sa pagdawat sa pundo, gimanduan ni Archival si City Treasurer Emma Villarete sa pagpagawas sa kwarta isip pagtuman sa iyang saad atol sa iyang State of the City Address (SOCA) nga dili malangan ang paghatag og tabang ngadto sa mga barangay.

Ang matag barangay nakadawat og ?200,000 diin ?100,000 ang ibubo alang sa edukasyon ug ?100,000 alang sa social service equipment.

Ang pundo alang sa edukasyon, gimanduan ang mga barangay kapitan nga mohatag og tag ?20,000 nga scholarship sa lima ka kwalipikadong tinun-an sa kolehiyo.

Suma pa ni Rex Millan, secretary sa LnB-Cebu City ug barangay kapitan sa Kalubihan nga adunay pipila ka residente ang nipadayag nga dili patas ang paglimit sa lima lang ka benepisyaryo matag barangay. Apan giklaro ni Millan nga gisunod lang sa mga barangay ang gimando sa nasudnong gobyerno.

Samtang ang barangay kapitan sa San Nicolas Proper nga si Clifford Jude Niñal miingon nga ilang gihatagan og prayoridad ang mga tinun-an nga determinado nga mopadayon sa pag-eskwela ug gikan sa mga kabus nga pamilya aron masiguro nga ang scholarship mahatag sa labing nanginahanglan.

Samtang, dili diretsong ipagawas ngadto sa mga barangay ang laing ?100,000 nga gituyo alang sa pagpalit og mga tolda (tents) ug monobloc chairs. Ang LnB-Cebu City chapter mao ang mopalit niini pinaagi sa bulk procurement ug maoy moapod-apod sa mga gamit aron malikayan ang posibleng obserbasyon sa Commission on Audit (COA). (BANAT NEWS)