Testigo sa ‘Operation Romanov’ vs VP ipiprisinta ng depensa

MANILA, Philippines — Kinumpirma ng Defense Team ni Vice President Sara Duterte na magpiprisinta sila sa Impeachment Trial sa Senado ng testigo para patunayan na totoo ang “Operation Romanov” laban kay Vice President Sara Duterte.

Sa pagsisimula ng pang-apat na araw ng trial, inusisa ni Senator-Judge Raffy Tulfo ang abogado ng depensa na si Atty. Mark Vinluan tungkol sa sinasabing banta sa buhay ng Bise Presidente at ng pamilya nito na tinawag na “Oplan Romanov.”

Tinanong ni Tulfo kung ang nasabing operation Romanov na binanggit ni Vinluan ay ang kahalintulad din na Oplan Romanov na binanggit ng blogger na si Princess Maui sa online press conference ni VP Sara.

“Now, Atty. Vinluan, this operation Romanov that you mentioned, are you referring to the Operation Romanov mentioned by the blogger Princess Maui during the online press conference of VP Sara?” tanong ni Tulfo.

Sumagot naman ng “Yes, Your Honor,” si Vinluan.

Tinanong din ni Tulfo kung bakit wala sa hanay ng mga testigo ng depensa ang blogger na si Princess Maui sa isinagawang pre-trial order at kung ipi-prisinta ba itong testigo sa trial.

Sinabi ni Vinluan na depende ito kung ano ang mapapatunayan ng prosekusyon kaya inire-reserve nila ang kanilang karapatan na magpatawag ng karagdagang testigo.

Pero kinumpirma ni Vinluan na magpi-presenta sila ng iba pang testigo para patunayan ang banta laban sa Bise Presidente.

“Yes, Your Honor. That will be part of our evidence in chief,” ani Vinluan.

Tumanggi rin si Vinluan na tukuyin kung sinu-sino pa ang ihaharap nilang testigo.