Arnell Ignacio, kinasuhan sa P1.4 bilyong land deal

MANILA, Philippines — Sinampahan na ng Office of the Ombudsman ng kasong Usurpation of Official Functions si ­dating Overseas Workers Welfare Administration (OWWA) Administrator Arnell Ignacio, kaugnay ng P1.4 bilyong property acquisition ng ahensiya.

Ayon kay Department of Migrant Workers (DMW) Secretary Hans Leo Cacdac, natanggap nila noong Hulyo 7, 2026 ang resolusyon ng Ombudsman na may petsang Hunyo 19, 2026. Nakasaad dito na nilagdaan ni Ignacio ang contract to sell, deed of absolute sale, at addendum nito, at kalaunan ay ina­prubahan ang paglalabas ng pondo ng gobyerno nang walang awtoridad mula sa OWWA Board of Trustees.

“The finding of the Ombudsman is to charge the former administrator with usurpation of official functions under Article 177 of the Revised Penal Code,” ani Cacdac.

Dagdag pa sa resolusyon, umakto si Ignacio na para bang may kapangyarihan mula sa Board kahit alam niyang wala, bagay na hindi simpleng “administrative non-compliance” kundi direktang bumubuo ng krimen ng Usurpation of Official Functions.

Natuklasan din ng Ombudsman na ang hindi pagkuha ng pag-apruba mula sa Board ay hindi lamang teknikal na pagkukulang, kundi isang pag-bypass sa institutional oversight at transparency na nakasaad sa OWWA Charter.

Ipinaliwanag ni Cacdac na ang naturang krimen ay may kaparusahan mula anim na buwan hanggang apat na taong pagkakabilanggo, depende sa magiging hatol ng hukuman. Inutusan na rin ng Ombudsman na maisampa ang impormasyon laban kay Ignacio sa kaukulang korte.

Samantala, kabilang sa resolusyon ang ikalawang bahagi na tumutukoy sa reklamo para sa paglabag sa Anti-Graft and Corrupt Practices Act, malversation of public funds, at plunder. Gayunman, dinismis ng Ombudsman ang corruption complaints laban sa ilang dating OWWA officials at mga pribadong nagbenta ng lupa.

Tiniyak ni Cacdac na iaapela nila ang dismissal at magsusumite ng Motion for Reconsi­deration. “We wish for the honorable Office of the Ombudsman to review these matters,” aniya, at binigyang-diin na tututukan nila ang dalawang punto: ang pagbibigay ng undue advantage sa seller at ang pinsalang idinulot sa pamahalaan.