Higit 6K public schools, nag-suspend ng klase kay ‘Inday’

MANILA, Philippines — Higit 6,000 pampublikong paaralan sa 11 rehiyon ang nagsuspinde ng face-to-face classes nitong Biyernes at lumipat sa Flexible Learning Options bunsod nang pananalasa ng bagyong Inday.

Sa inilabas na Disaster Risk Reduction and Management Service (DRRMS) situation report ng DepEd, kabuuang 6,102 public schools na ang nagkansela ng face-to-face classes, na nakaapekto sa 3,681,612 mag-aaral at 149,659 personnel sa 52 Schools Division Offices (SDOs) sa 11 rehiyon.

Batay sa report, nasa 2,075 paaralan sa National Capital Region (NCR) ang nakapagtala ng class suspensions; na sinundan ng Region IV-A (Calabarzon) na may 1,692; Region III (Central Luzon) 802; Region IV-B (Mimaropa) 760; Region XIII (Caraga) 379; Region II (Cagayan Valley) 166; Region V (Bicol) 136; Region I (Ilocos Region) 113; Region IX (Zamboanga Peninsula) 57; Region VI (Western Visayas) 32; at Region X (Northern Mindanao) 14 paaralan.

Ilang paaralan naman sa Region VI ang nagpatuloy ng kanilang klase.

Ayon sa DepEd, ang paglipat ng mga paaralan sa flexible learning ay naglalayong matiyak ang pagpapatuloy ng edukasyon habang pinuprotektahan ang mga mag-aaral, mga guro, at mga school personnel mula sa epekto ng masamang panahon.