Way permit nga septic hauler gidakop sa taga CCENRO

CEBU, Philippines — Gidakop sa Cebu City Environment and Natural Resources Office (CCENRO) ang septic tank hauler pinaagi sa usa ka entrapment operation niadtong Hulyo 9, 2026 sa buntag sa Balagtas Street, Barangay Pahina Central.

Nasakpan sila nga naggamit og delivery-type van sa pagdala og hinabwa nga hugaw sa mga tawo bisan og wala kini akreditasyon gikan sa CCENRO ug nakalapas sab kini sa mga lagda sa Septage Management Program sa siyudad.

Nasayran ang maong septic tank hauler nagagikan pa sa Lungsod sa Liloan ug walay permit nga magpahigayon og kalihukan dinhi sa syudad.

Matud ni Joseph Agbalog, focal person sa Septage Division sa CCENRO nga dili angay gamiton ang maong sakyanan alang sa pagdala og septic waste o hugaw gikan sa septic tanks tungod kay wala kini makasunod sa  Implementing Rules and Regulations (IRR).

Nagtuo ang CCENRO nga kargahanan og karne o adunay gikarga nga chichirya ang maong van apan wala sila magdahom nga hugaw sa tawo ang gikarga niini.

Gipasabot sab ni Agbalog nga ang tanang septic haulers kinahanglan mailhan dayun ug naay akreditasyon gikan sa CCENRO.

Gipadayag ni Engr. Editha Peros, ang labaw sa CCENRO nga gawas sa kakuwang sa akreditasyon, nakalapas usab ang operator sa Section 17 sa Cebu City Septage Management Ordinance.

Ubos sa maong ordinansa, obligado ang matag septic haulers magdala og Manifest Receipt sa matag higayon nga magdala og lapok o hugaw sa tawo ngadto sa treatment facility.

Kinahanglan nga detalyado sama sa gigikanan sa hugaw, ngalan ug address sa kliyente, petsa ug oras sa pagkolekta, gidaghanon sa hugaw, ngalan sa operator ug kompanya, kapasidad sa sakyanan, plate number, ug ngalan sa drayber.

Kinahanglan usab kini mapamatud-an sa barangay kun diin gikan gikolekta ang hugaw ug kinahanglan nga makumpirma sa hatdan nga treatment facility.

Apan napakyas ang hauler sa pagsunod niini, lakip na ang pagsumite sa kopya ngadto sa CCENRO alang sa binuwang report ug uban pang dokumento nga gikinahanglan sa treatment facility.

Tungod sa mga kalapasan lakip ang kakuwang sa akreditasyon pagpakita og Manifest Receipt, pamultahan ang hauler og ?14,000.

Duna lamang 12 ka septic waste haulers nga rehistrado sa CCENRO apan naay unom nga dili rehistrado nga gpadayon gihapon sa operasyon.

Ang CCENRO nagkanayon nga daghang residente ang mopili gihapon sa serbisyo sa mga ilegal nga haulers kay mas barato ang singil niini bisan pa sa dakong risgo nga mahimong hinungdan sa kontaminasyon sa mga sapa o dagat.

Giawhag ni Agbalog ang publiko nga i-report dayon sa CCENRO ang mga kadudahang mga septic haulers aron maaksyunan dayon.— Caecent No-ot Magsumbol/IBM BANAT NEWS