PNP nisugyot sa Run, Duck, Hide nga protocol sa mga eskwelahan

CEBU, Philippines — Gisugyot sa Cebu City Police Office (CCPO) ug Cebu Police Provincial Office (CPPO) ang pagpatuman sa “Run, Duck, Hide” nga active shooter response protocol sa mga eskwelahan aron mapalig-on ang siguridad sa mga estudyante ug magtutudlo.

Matud ni Police Major Marvin Fegarido, hepe sa Police Community Relations Unit sa CCPO nga ang maong protocol nag-awhag sa pag-ikyas dayon kon adunay luwas nga agianan.

Ug kon dili posible ang pag-ikyas ang mga estudyante ug magtutudlo kinahanglang mohupo, mangita’g kapasalipdan o motago aron malikay sa peligro.

Ang pagsukol sa armado nga suspek ikonsidera lang isip kataposang kapilian kon namiligro na ang kinabuhi og wala nay kaipsotan.

Si Police Lieutenant Colonel Jose Rovic Villarin, deputy provincial director for operations sa CPPO nagkanayon nga lakip sa gisugyot nga protocol ang pag-lock sa mga pultahan sa classroom ug opisina, pagpalong sa suga, paghilom sa mga naa sa sulod sa lawak ug pag-instolar og push-to-open doors aron mas sayon ang pag-evacuate ug masiguro ang siguridad panahon kong adunay insidente sa pagpangatake sa eskwelahan.

Samtang ang Mabolo Police Station nipahimangno kini ngadto sa publiko nga ang paghimo og bomb threat o death threat pinaagi sa tawag, text, social media, email o uban pa’ng paagi sa komunikasyon usa ka seryosong krimen nga adunay katugbang nga kaso.

Matud sa kapolisan nga ang maong mga hulga magmugna og kahadlok ngadto sa publiko, makabalda sa kahapsay sa komunidad ug makapa-divert sa oras ug sa trabaho sa mga otoridad nga angay unta nga gamiton sa tinuod nga mga emerhensiya.

Giawhag usab ang publiko ilabina ang mga ginikanan nga tudloan ang kabatan-onan sa responsableng paggamit sa social media ug i-report dayon kong adunay mga hulga ngadto sa kapolisan.

Sa laing bahin, ang Department of Education (DepEd) mopasiugda og active shooter drills sa mga eskwelahan sugod ugma, matud ni Education Secretary Sonny Angara.

Tumong sa maong lakang mao ang pag-andam sa mga estudyante ug magtutudlo kon unsay angay’ng buhaton panahon kong adunay mga armado nga moatake sulod sa school campus.

Kini subay sa nahitabong pagpamusil ngadto sa San Jose National High School sa Tacloban City diin tulo ka estudyante ang namatay ug 20 ang nangaangol.

Ang suspetsado sa maong hitabo duha ka estudyante sa grade 9 nga nagpangedaron og 14 ug 15-anyos.

Si Angara nagkanayon nga Miingon makig-coordinate siya sa DepEd, Philippine National Police ilabina sa Special Weapons and Tactics (SWAT) teams sa pagsusi sa mga eskwelahan kon adunay bomb threat sa dili pa tugotan ang pagpadayon sa klase.

Dugang ni Angara nga dili angay nga awtomatikong suspendehon ang klase sa matag hulga apan kinahanglan una nga masuta sa mga otoridad pinaagi sa security assessment ug clearing operations kon adunay tinuod nga peligro. (BANAT NEWS)