Cebu midemolis sa Negros, ikaduha na sa South Division

CEBU, Philippines — Ang Cebu Greats/MJAS Zenith miinat sa mainit nilang ratsada ngadto sa unom ka duwa human gikulata ang  Negros Hacienderos, 124-77, sa SportsPlus Maharlika Pilipinas Basketball League (MPBL) Season 8 niadtong Lunes sa gabii, Hulyo 6, didto sa Ynares Sports Arena sa dakbayan sa Pasig.

Si Elmer Echavez mipakita sa labing nindot niyang performance sul-ot ang uniporme sa Cebu uban ang solidong double-double nga 19 puntos ug 17 ka rebounds.

Lain pang lima ka players sa Cebu ang mikadlit og double figures, apil si Simon Camacho nga mipupo og 12 puntos ug 11 ka rebounds sa dihang ang Greats midaog sa ika-11 nga higayon sa miagi nilang 12 ka duwa aron paglayat sa ikaduhang puwesto sa South Division standings bitbit ang 13-3 rekord.

Si Ron Dennison midugang og 12 puntos, si CJ Payawal mi-iskor og 11 samtang sila si Mark Meneses ug Alvin Baetiong mitali og 10 puntos matah usa alang sa Greats, nga milabaw og 24 puntos sa halftime, 53-29, nga ilang pang giinat ngadto sa 31 puntos, 83-52, human sa tulo ka kuwarter.

Padayong gikastigo sa Greats ang Hacienderos sa katapusang bahin sa duwa padung ngadto sa 47 puntos nga  demolisyon.

Ang Cebu makigharong sunod sa Bacolod Mascarras karong Huybes, Hulyo 9, didto sa STRIKE Gymnasium sa Bacoor, Cavite.

Human niini, ang Greats mopakita'g aksiyon atubangan sa ilang mga fans sa duha ka sagunson nga home games batok sa Biñan Tatak Gel karong Hulyo 16 sa Hoops Dome sa dakbayan sa Lapu-Lapu ug batok sa Batang Kankaloo karong Hulyo 18 sa Cebu Coliseum.