Seguridad sa mga tunghaan gipahugtan

CEBU, Philippines — Nagbutang og mga polis ang Cebu City Police Office (CCPO)  sa 287 ka pampubliko ug pribadong elementarya ug sekondaryang eskwelahan sa dakbayan ubos sa Oplan Ligtas Eskwela aron mapalig-on ang seguridad sa mga kampus ug masiguro ang kaluwasan sa mga estudyante ug school personnel. Sa Openline News Forum niadtong Martes, Hulyo 7, miingon si Police Lieutenant Colonel Franco Rudolf Oriol, deputy city director for administration ug tigpamaba sa CCPO, nga ang maong programa sa seguridad ipatuman sa tibuok tuig.

Matud pa niya gisugdan ni ubos sa administrasyon ni Cebu City Mayor Nestor Archival, bisan sa wala pa mahitabo ang bag-ohay nga insidente sa pagpamusil sa Tacloban City. Gikumpirmar usab ni Oriol nga lima ka bag-ong security threats ang natala sa mga eskwelahan ug ubang establisemento sa Cebu City.

Bisan pa niini, giklaro ni Oriol nga wala silay nakitang adunay organized crime o terrorist group nga nalambigit sa lima ka security threats ug gihulagway niya nga mga isolated cases  ug a personal ang motibo sa mga nalambigit.               

Seguridad ug Kaluwasan

Sa pikas bahin, gipakusgan sa DepEd-7 ang pagpalig-on sa kaluwasan sa mga eskuylahan, kaandam kun dunay emerhensiya  pinaagi sa koordinasyon, pagpahigayon og regular emergency drills ug paghatag og gahum sa mga regional directors nga makasuspenso sa mga klase kun dunay hulga sa seguridad. Atol sa Kapihan sa PIA-7 forum adtong Martes,  si DepEd-7 Regional Director Dr. Arturo Bayocot niingon nga human sa ilang virtual meeting nga gipangunahan ni Education Secretary Sonny Angara, ilang gi-review ang tanang giamendahang DepEd orders mahitungod sa school safety ug security, ug gituki nila ang mga gipatumang pamaagi ug nipaambit sab ang uban sa ilang tagsa-tagsa ka mga kasinatian sa ilang nagkadaiyang hurisdiksyon.

Matud pang Bayocot naay otoridad ang mga regional directors mosuspenso sa klase kun dunay hulga sa seguridad.

“When there is a security threat, we have to prioritize the safety of our learners, teachers, and school personnel,” matud niya.

Way Cellphone Ban

Sa laing bahin, gipahibalo ni  Bayocot nga naay  direktiba sa una pa ang DepEd bahin anang polisiya sa pagdala sa mga  estudyante ug paggamit og  cellphone sulod sa mga eskuylahan. Matud niya walay executive order o official memorandum nga giisyu ni bisan kinsang local government unit (LGU) nga makalabaw sa Department Order No. 6, series of 2020.Matud niya, gamit kaayo sa mga tinun-an ang cellphones tungod kay naay mga technology-driven instructions ug online research.

Apil sa unod sa maong direktiba ang paghatag og otoridad sa mga magtutudlo para kolektahon ang mga cellphones sa dili pa magsugod ang klase ug ibalik kini sa mga tinun-an ini og human sa klase.

Sa naghinapos nga bahin sa bulan sa Hunyo, si Mayor Guntrano “Gungun” Gica sa Dumanjug nipagawas og kamandoan pag-ban sa mga tinun-an pagdala og cellphones sa sud sa mga eskuylahan para daw ma-pokus sila sa ilang pagtuon. The Freeman/IBM BANAT NEWS