Walo ka Temporary Learning  Shelter sa probinsiya tukoron na

CEBU, Philippines — Gisugdan na og tukod sa Probinsiya sa Sugbo ang walo ka Temporary Learning Shelter (TLS) sa nagkalainlaing pampublikong eskwelahan sa habagatang bahin sa lalawigan aron matubag ang kakuwang sa classroom samtang wala pa mahuman ang permanenteng mga building sa eskwelahan.

Si Gobernadora Pamela Baricuatro mao ang nangulo sa groundbreaking ceremony niadtong Sabado, Hulyo 4, alang sa proyekto nga makabenepisyo sa mga lungsod sa Boljoon, Alcoy, Dalaguete ug Argao.

Kabahin kini sa programa sa Kapitolyo nga nagtinguha sa paghatag og dugang lawak-saringan aron dili maapektuhan ang pag-eskwela sa mga estudyante samtang nagpadayon ang pagtukod ug pag-ayo sa permanenteng classroom.

Ubos sa proyekto, tulo ka TLS ang tukoron sa El Pardo Elementary School sa Boljoon.

Usa usab ka TLS ang matagamtaman sa Bala-as Elementary School ug Langtad Elementary School sa Argao, Mantalongon Elementary School ug Obong Elementary School sa Dalaguete, ug Pasol-Pugalo Integrated School sa Alcoy.

Naggahin ang Kapitolyo og P9.12 milyon alang sa pagtukod sa maong walo ka temporaryong classroom.

Sa iyang mensahe, gisiguro ni Baricuatro nga magpadayon ang suporta sa probinsiyal nga kagamhanan sa sektor sa edukasyon ug sa mga pampublikong eskwelahan sa lalawigan.

 "Ang inyong provincial government naa ra nagpaluyo ninyo, naningkamot unsaon na ma arang-arang ang kahimtang sa atong mga eskwelahan," matud pa sa gobernador.

Gipahibawo usab niya nga maggahin pa ang Kapitolyo og dugang pondo alang sa pipila ka mga eskwelahan nga pagatukoran og duha ka andana nga classroom.

Sumala kang Provincial School Board focal person Christopher Baricuatro, 252 na sa kinatibuk-ang 269 ka Temporary Learning Shelter sa tibuok Sugbo ang nahuman na ang bidding ug gilauman nga masugdan na ang pagtukod niini.

Ang nahibiling 17 ka proyekto, kasagaran alang sa mga isla nga lungsod, nga pahigayonan pa og laing bidding human nasuta nga kulang ang unang gigahin nga pondo tungod sa mas mahal nga gasto sa konstruksyon sa mga isla.

Base sa datos sa Kapitolyo, mokabat og P1.141 milyones ang gasto sa usa ka TLS classroom sa mainland, samtang P1.185 milyon ang gibanabana nga gasto sa matag classroom sa mga isla nga lungsod.

Una nang naggahin ang Kapitolyo og kapin P295 milyon alang sa implementasyon sa TLS program, diin gibana-bana nga mokantidad og P1.1 milyon ang matag temporaryong classroom.

Lakip sa mga lungsod nga sakop sa programa mao ang Minglanilla, Argao, Dalaguete, Alcoy, Boljoon, Barili, Dumanjug, Ronda, Moalboal, Alegria, Badian, Malabuyoc, Ginatilan, Consolacion, Liloan, Compostela, Carmen, Catmon ug Sogod, samtang apil usab ang mga isla nga lungsod sa Poro, Tudela ug Pilar.

Gawas sa groundbreaking, nagtugyan usab ang Kapitolyo og 20 ka industrial fans ngadto sa nagkalainlaing barangay sa Argao pinaagi sa Local Assistance Fund ni Board Member Raymond Calderon.  (BANAT NEWS)