Guarantee letter sa DSWD dawaton sa Mercury Drugs

CEBU, Philippines — Madawat na karon sa 24 ka mga branches sa Mercury Drug store sa tibuok Central Visayas ang mga Guarantee Letter (GL) sa benepisyaryo sa programa nga Assistance to Individuals in Crisis Situation (AICS), sumala sa Department of Social Welfare and Development (DSWD) Region 7. Sa 24 ka mga participating branch sa rehiyon, 16 niini anaa sa Probinsya sa Cebu ug walo sa Bohol.

Nagsugod pagdawat og mga guarantee letter ang botika sukad Hunyo 22, nga naghatag og mas paspas ug mas sayon nga pag-access sa medikal nga tabang alang sa mga indibidwal nga nanginahanglan.

Si DSWD Field Office VII Regional Director Shalaine Marie Lucero nihangop sa padayon nga pakigtambayayong sa Mercury Drug, nag-ingon nga kini nagpalig-on sa mga paningkamot sa ahensya nga mahimong mas responsive ug accessible and mga tabang gikan sa gobyerno.

Si Lucero miingon nga pinaagi aning partnership, ang mga benepisyaryo mahimong makakuha dayon sa ilang gireseta nga mga tambal ug malikayan na ang pagkalangay nga matambalan tungod sa problema sa pinansyal.

Ubos sa programang AICS, ang mga benepisyaryo nga gi-isyuhan og DSWD Guarantee Letters mahimong mopresentar sa dokumento sa participating Mercury Drug branches aron makakuha og mga gireseta nga tambal nga sakop sa tabang. — /MEL (BANAT NEWS)