12-anyos edad ng criminal liability kailangang aralin ng mga eksperto

MANILA, Philippines — Nais ni Pangulong Ferdinand Marcos Jr. na magkaroon ng isang maingat na pag-aaral sa mga panawagan na ibaba ang edad ng criminal responsibi­lity sa 12 kasunod ng pamamaril sa isang paaralan sa Tacloban City noong nakaraang buwan.

“‘Yung ating mga child psychologists, ‘yung mga surveys na ginagawa about the mental health of children. Kailangang pag-aralang mabuti ‘yan,” ani Marcos sa mga mamamahayag sa Vancouver.

Matatandaan na tatlo ang namatay sa pamamaril sa San Jose National High School at 20 iba pa ang nasugatan kaya binuhay ang mga panawagan na i-regulate ang social media at magkaroon ng batas laban sa recruitment sa ‘nihilistic violent extremism’.

Ang kasalukuyang minimum age ng criminal responsibility ay 15, kung saan ang mga nakababatang nagkasala ay inilalagay sa mga intervention programs at counseling.

Binigyang-diin ni Marcos ang pangangailangang isaalang-alang ang mga opinyon ng mga eksperto kaugnay sa mga epekto ng pagkakalantad sa social media sa pag-uugali ng mga bata.

Kung ibababa ang edad ng pananagutan para sa mga kahalintulad na mga krimen, nangangahulugan aniya na ang mga bata ay nagbago na kumpara sa mga nagdaang panahon.

Ikinalungkot din ni Marcos ang mga potensyal na epekto ng social media, tulad ng sekswalisasyon ng mga kabataan at ang pagiging desensitized sa pagpatay at karahasan sa mga menor-de-edad sa pamamagitan ng marahas na mga laro.

Aniya, dapat isaalang-alang ang opinyon ng mga eksperto sa sikolohiya ng mga bata at epekto ng social media sa mga bata, at ang kanilang mga aksyon na ginagawa kapag hindi sila naglalaro ng mararahas na mga laro online.