NLEX wagi sa Converge sa tune-up
MANILA, Philippines — Dumiretso ang NLEX sa kanilang ikalawang sunod na panalo sa tune-up games matapos talunin ang Converge, 123-101, kahapon bilang preparasyon sa PBA Season 50 Governors’ Cup.
Muling sinandigan ng Road Warriors sina balik-import DeQuan Jones, Robert Bolick at Schonny Winston para patumbahin ang FiberXers.
Nauna nang tinakasan ng NLEX ang Blackwater, 117-116, kung saan naupo lamang sa bench si bagong head coach Jimmy Alapag para obserbahan ang laro ng PLDT team.
Ito ang unang pagkakataon na pinamahalaan ng dating TNT Tropang 5G at Meralco Bolts point guard ang Road Warriors.
Pinaghahandaan ng NLEX ang pagsagupa sa guest team Macau Giant Pandas sa pagsisimula ng PBA Season 50 Governors’ Cup sa Hulyo 10 sa Ynares Center sa Antipolo City.
Hindi naglaro sa Converge sina guard Juan Gomez de Liaño at center Justine Baltazar na kasama ng Gilas Pilipinas sa kampanya sa FIBA Basketball World Cup Asian Qualifiers.
Bukod kina Jones ng Road Warriors at Jalen Hudson ng FiberXers, ang iba pang balik-imports ay sina Justin Brownlee ng Ginebra Gin Kings, Aaron Fuller ng Rain or Shine Elasto Painters at George King ng San Miguel Beermen.
Ang mga bagong salta ay sina Darius Days (TNT), Jordon Varnado (Meralco), KJ Buffen (Magnolia), Kentrell Barkley (Blackwater), Justin Strings (Terrafirma), Tirrell Brown (Titan Ultra), BJ Johnson (Phoenix) at De’Vondre Perry (Macau).
- Latest
