Plea bargainer nakuhaag P6.8 milyong shabu

CEBU, Philippines — Usa ka 40-anyos nga lalaki nga gikonsiderang high-value target (HVT) ang nadakpan sa usa ka buy-bust operation nga gipahigayon sa kaadlawon sa Biyernes, Hulyo 3, 2026, sa Sitio Tipolo, Barangay Guadalupe, Cebu City, ug nasakmit ang gibanabana nga P6.8 milyones nga kantidad sa gituohang shabu. Ang operasyon gilusad sa hiniusang pwersa sa Philippine Drug Enforcement Agency Regional Office 7 (PDEA-7), Cebu City Police Office Station 9, Philippine Coast Guard Central Visayas Intelligence Unit ug Intelligence Group, ug Regional Intelligence Division Tracker Team sa Police Regional Office 8.

Giila ni PDEA-7 Regional Director Joel B. Plaza ang nadakpang suspek nga si alyas Niño, 40, residente sa Barangay Cembo, Makati City.

Usa ka paketeng gituohang shabu nga usa ka kilo, buy-bust money, usa ka cellphone, ug uban pang mga ebidensya ang nakuha gikan niya. Tulo hangtod lima ka kilong shabu matag semana ang matud pa mabaligya niini sa mga lugar sa Central Visayas ug Eastern Visayas.

Ang suspek nadakpan na sa National Capital Region niadtong 2021 tungod gihapon sa drugas apan niadtong 2024 nakapahimulos kini sa plea bargaining agreement ug nakagawas. Naabot siya sa Cebu adtong Hulyo 2, 2026 gikan sa NCR sa wala pa ang buy-bust operation. IBM BANAT NEWS