Duha naigo sa kilat, usa patay

CEBU, Philippines — Patay ang usa ka 16-anyos nga Grade 10 nga estudyante samtang naluwas ang usa pa ka 14-anyos nga menor de edad human sila naigo sa kilat atol sa ilang piknik sa baybayon sa Purok Santan, Barangay Daanlungsod, Tuburan, sa alas-3 sa hapon niadtong Huwebes, Hulyo 2.

Sumala sa report sa Tuburan Municipal Police Station, ang namatay gidala sa mga rescuer sa ANDAM Tuburan ngadto sa Tuburan District Hospital apan gideklarar siyang dead on arrival alas 3:36 sa hapon sa maong adlaw. Samtang ang 14-anyos padayong gi-monitor sa maong tambalanan.

Sa inisyal nga imbestigasyon sa kapulisan, ang duha ka biktima kauban ang ilang mga higala nga nagpiknik sa baybayon sa dihang miigo ang kilat.

Base sa asoy sa uyab sa namatay, naligo sila sa mabaw nga bahin sa dagat sa dihang kalit nga nikilat ug direktang naigo ang iyang uyab, nakuryentihan sab siya ug ang 14-anyos.

Dali silang nibalik sa baybayon apan nabiyaan ang namatay kay nawad-an kini og panimuot. Ang mga ig-agaw niini na ang nikuha sa iya gikan sa dagat ug gidala sa tambalanan.

Daan ng gipahimangno sa mga otoridad sa publiko nga likayan ang pagpangaligo sa dagat kun dautan ang panahon.— IBM BANAT NEWS