VM Tommy O. supak nga usbon ang rota sa CBRT

CEBU, Philippines — Moduso og resolusyon si Bise Mayor Tomas Osmeña nga awhagon ang Department of Transportation (DOTr) nga isalikway ang gisugyot nga usbon ang rota sa Cebu Bus Rapid Transit (CBRT) ug ibalik ngadto orihinal nga rota gikan sa Barangay Bulacao hangtud sa Barangay Talamban.

Nalatid sa resolusyon nga ang Bulacao–Talamban mao ang orihinal nga rota ug gihimo kini base sa daghang teknikal nga pagtuon, transport planning ug konsultasyon sa mga stakeholders aron maserbisyohan ang mga Sugbuanon nga padayon nga nigamit sa maong rota matag adlaw.

Anaa sab sa resolusyon nga usa ka dakong kausaban gikan sa orihinal nga plano sa proyekto ang gisugyot nga bag-ong rota gikan sa SM Seaside City Cebu sa South Road Properties (SRP) paingon sa Ayala Center Cebu.

Matud pa dako og posibilidad nga gamay lang ang makabenepisyo nga mga pasahero ug dili makaserbisyo og tarong tungod kay liboan ang mga pasahero nga padayon nga migamit sa dalan gikan sa Bulacao paingon sa Talamban.

Ang bise mayor nagkanayon nga ang maong realignment dili mao ang rotang gipresentar atol sa pagplano, konsultasyon, ug pag-aprubar sa pundo alang sa proyekto ug nakita nga nilayo na sab kini sa orihinal nga katuyoan sa CBRT nga maghatag og moderno, episyente ug accessible nga mass transport system alang sa libuan nga residente sa syudad nga nagbyahean matag adlaw ug nagsalig sa pampasaheroang sakyanan.

Gipahinumduman sab sa bise mayor pinaagi sa usa ka resolusyon nga ang suporta sa World Bank alang sa CBRT gibase sa orihinal nga Bulacao–Talamban alignment nga mao ang giila nga adunay pinakadako nga potensyal nga masulbad ang problema sa transportasyon sa siyudad.

Ang maong resolusyon sa bise mayor tukion karong Martes, Hunyo 30, 2026 apan daan na nga nipadayag ang bise mayor nga supak siya nga ang ruta sa CBRT nga manukad gikan sa SRP hangtud sa Ayala.

Kun maaprobahan ang resolusyon, pormal nga awhagon sa konseho ang DOTr nga hingpit nga isalikway ang gisugyot nga realignment ug ipadayon ang implementasyon sa CBRT subay sa orihinal nga ruta.

Gitinguha ni Osmeña nga mapreserbar ang integridad sa orihinal nga disenyo ug mga tumong sa CBRT pinaagi sa pagsiguro nga ang umaabot nga implimentasyon sa proyekto masunod subay sa mga gihimo nga mga saad sa publiko kun diin nakaangon kini og lokal ug internasyonal nga suporta aron nga mapagaan ang pamaagi sa transportasyon sa syudad. — /IBM (BANAT NEWS)