Lalaki gipusil patay, 3 suspek nadakpan
CEBU, Philippines — Patay ang usa ka 35-anyos nga lalaki human gipusil sa Barangay Catarman II, Cordova, Cebu, pasado alas 8:00 sa gabii niadtong Hunyo 26.
Ang biktima giila nga si Johnrey Mercado Sumagang, ul residente sa maong barangay. Human sa pagpamusil, gidala pa siya sa Carahay District Hospital sa Lapu-Lapu City apan gideklarang patay sa attending physician alas 10:14 sa maong gabii.
Sumala sa Cordova Municipal Police Station, dali silang nagpahigayon og hot pursuit operation nga miresulta sa pagdakop sa tulo ka mga suspetsado alas 9:40 sa gabii.
Ang mga nadakpan mao sila si Manuel Orque Mejica, 58 anyos, nga giingong maoy mipusil sa biktima, si Joelito Trasmil Dinoy, 52, ug si Richell Jumao-as Tago, 43, nga giingong kakunsabo sa gunman pagbuhat sa krimen.
Atol sa operasyon, nasakmit sa mga kapulisan ang usa ka improvised shotgun o lokal nga gitawag og "pugakhang", usa ka basiyo nga 12-gauge shotgun shell, upat ka buok live nga 12-gauge shotgun shells, usa ka sling bag nga gisudlan sa mga bala, ug usa ka Kawasaki 100 tricycle nga giingong gigamit sa mga suspetsado sa pag-ikyas.
Ang tulo ka mga suspetsado anaa na karon sa kustodiya sa Cordova Municipal Police Station samtang giandam ang angayng mga kaso batok kanila.
Padayon pa ang imbestigasyon sa kapulisan aron matino ang motibo sa krimen ug hinongdan sa pagpamusil. — /IBM (BANAT NEWS)
- Latest
