Yap, Ching nagpahabol ng medalya
MANILA, Philippines — Nagpahabol pa ng medalya sina World No. 1 Aislinn Yap at Jasmine Ching sa pagtatapos ng 11th Asia-Oceania Sambo Championships na inihahandog ng Philippine Sports Commission kahapon sa Ninoy Aquino Stadium sa Malate, Manila.
Matagumpay na naidepensa ni Yap ang kanyang korona sa women’s -80-kilogram combat sambo matapos ungusan si five-time Kazakhstan national champion Zamzagul Faizollanova, 1-0, para angkinin ang gold medal.
Idinagdag ito ni Yap sa naunang dalawang ginto nina national team members Jomary Torres at Aumagel Princess Cortez laban sa kanilang mga Kazakhstan rivals sa torneong itinataguyod ng National Sports Tourism Interagency Committee na pinamumunuan ni PSC chairman Patrick Gregorio.
Dinomina ni Torres si Zhadyra Paiyz sa women’s combat sambo -50kg category, habang tinalo ni Cortez si Mervet Berdikhanova sa women’s combat sambo -59kg class.
Maliban sa tatlong golds ay kumalawit din ang mga national grapplers ng apat na silvers at pitong bronzes.
Ang apat na pilak ay mula kina World No. 7 Sydney Sy (women’s combat sambo +80kg), Sophia Novino (women’s youth -47kg), Jasmaine Henryk Ching (women’s -54kg sport sambo) at Christi Angelic Espolong (women’s junior combat sambo -59kg).
- Latest
