Kapin usa ka libong baboy nangamatay

CEBU, Philippines — Kalit nga nangamatay tungod sa wala pa masuta nga matang sa mga sakit ang kapin usa ka libo ka mga baboy sa Negros Occidental apan usa sa gidudahan ang gikahadlokan kaniadto sa mga namuhi og baboy ang African Swine Fever (ASF).

Sumala pa sa report sa Philstar.com, giingong 1,213 ka baboy ang namatay  sa maong probinsya.

Si Provincial Administrator Rayfrando Diaz II niingon nga ang maong gidaghanon, kwatro porsiyento ni sa 29,880 ka mga binuhing baboy sa tibuok probinsya nga ilang na-rekord gikan Mayo 22 hangtud Hunyo 20.

Gikompirmar sad ni San Enrique Mayor Jilson Tubillara nga 500 ka binuhing baboy sa iyang lungsod ang nangamatay, ug nakompirmar sa laboratory result ang  ASF.

Tungod ani, gitambagan ang mga hog raisers nga ipadayun ang estriktong pagsunod sa gilatag nga pamaagi aron mapugngan ang pagkatap og maayo sa maong sakit sa ubang mga baboyan. Pipila na ka mga LGUs sa Negros Occidental ang gipakusgan ilang border control ug biosecurity measures  human nakompirmar ang ASF sa San Enrique.

Usa sa mga pamaaging gisakop pagkontrol sa pagkuyanap sa maong sakit mao ang pagbuwag sa mga baboy nga gisuspetsahang natakboyan niini, hugot nga border control, pag-disinfect sa baboyan ug pag-ban sa buhi ug pork products nga gikan sa mga lugar nga naapektahan nga makaabot sa kamerkadohan.--Gikan sa Philstar.com/IBM BANAT NEWS