15-anyos shooter sa kulungan na tatanda
MANILA, Philippines — Kung mapapatunayan ng hukuman na nagkasala ang 15-anyos na shooter ng kasong multiple murder na naisampa ng pulisya ay maaari umanong sa kulungan na ito abutin ng kanyang senior citizen.
Ito ang pananaw ni Atty. Patricia Claire Oco ng Juvenile Justice and Welfare Council, isang attached agency ng DSWD dahil ang murder ay may katapat na parusang 40 taon na kulong o reclusion perpetua para sa mga adult.
Subalit, dahil 15-anyos ang isa sa suspect at kung napatunayang nagkasala ito sa kasong murder dahil sa pagplano sa krimen ay maaaring maibaba ang sentensiya nito sa reclusion temporal na may katapat na 20 taong pagkakulong.
Dahil aniya sa 3 counts of murder ang ikinaso rito dahil tatlo ang namatay na estudyante ay maaaring 60 taon ang kabuuang bilang ng parusa rito.
“Akala kase ng mga minors pagnagkaroon ng kaso ay hindi sila mapaparusahan dahil bata pa sila, mali ‘yun. Sa batas maaaring maparusahan ng batas ang 15 years old kapag matindi at karumal-dumal ang ginawang kasalanan, pero dahil bata siya, bababa ang sentensiya sa kanya” sabi ni Atty Oco.
Ang dalawang suspek ay nasa DSWD Rehabilitation Center sa Tacloban sa ngayon dahil ang Bahay Pagasa na kanlungan ng mga batang nagkakakaso sa Tacloban ay puno na.
Bukod dito ay aniyang managot sa kasong sibil o kriminal ang magulang at guardian ng 2 suspect oras na mapatunayan ng korte na mayroon silang naging pagkukulang at nagpabaya sa pangangalaga sa mga suspek kaya’t nagawa ang krimen.
- Latest
