70-anyos lola, tinodas ng tandem

MANILA, Philippines — Idineklarang dead-on-arrival ang isang 70-anyos na lola nang ito ay malapitang barilin sa ulo habang nakatayo sa bangketa ng angkas sa motorsiklo naganap nitong Miyerkules ng tanghali sa national highway, Barangay Puerta Real, Sto. Domingo, Ilocos Sur.

Kinilala ang nasawing biktima na si Imelda Tabil, residente ng Barangay Pussuac sa nasabing bayan. Lumalabas sa imbestigasyon na nakatayo ang biktima sa bangketa nang dumating ang isang motorsiklo.

Bumaba rito ang angkas at malapitang binaril ang biktima sa ulo na duguang bumulagta at agad na tumakas ang mga suspek.

Ang biktima ay dinala sa Ilocos Sur District Hospital ngunit idineklarang dead-on-arrival.  Narekober ng mga pulis ang isang basyo ng bala mula sa kalibre .45 na baril.

Isang manhunt operation ang inilunsad ng pulisya laban sa mga suspek.