RDC nihangyo sa paspas nga kaugmaran sa hall of justice

CEBU, Philippines — Gihangyo sa Regional Development Council sa Central Visayas (RDC)-7 ang Korte Suprema nga paspasan ang pagtukod sa permanente ug lig-on batok kalamidad nga hall of justice diha sa South Road Properties (SRP), Dakbayan sa Sugbo.

Ang maong hangyo gipadayag pinaagi sa resolusyon nga giendorso sa Development Administration Committee (DAC) ug isumite alang sa pag-aprobaa sa tibuok konseho sa RDC.

Matud sa RDC importante ang pagtukod sa bag-ong Hall of Justice aron masiguro ang paspas, patas ug walay hunong nga paghatag og hustisya sa mga lumulupyo sa Central Visayas.

Base sa Central Visayas Regional Development Plan 2023-2028 giila nga usa ka lig-on ug epektibong sestema sa hustisya maoy pundasyon sa pagpalig-on sa pagmando sa balaod ug pagsalig sa publiko ngadto sa mga institusyon sa gobiyerno.

Gipasabot usab sa konseho nga ang husto ug paspas nga pagresolba sa mga kaso makatabang sa pagpanalipod sa katungod sa katawhan ug sa pagpalambo sa ekonomiya ug kalinaw sa katilingban.

Usa sa mga lakang aron mapalambo ang pagdumala sa hustisya mao ang paglig-on sa kapasidad sa mga ahensiya nga naghatag niini pinaagi sa pagtukod ug pag-upgrade sa mga pasilidad sama sa mga korte, opisina sa prosekusyon, presohan ug uban pa’ng pasilidad kalabot sa hustisya. Nagkanayon ang RDC nga kinahanglan nga ang maong mga imprastraktura mahimong disaster-resilient ug climate-adaptive aron makapadayon ang operasyon bisan pa sa panahon sa kalamidad.

Ang panawagan sa RDC nitumaw human napugos sa duha ka higayon nga nabalhin  ang hall of justice sa Sugbo tungod sa kadaot sa mga edipisyo gumikan sa mga linog.

Niadtong Oktubre 15, 2013, grabeng nadaot ang kanhi Palace of Justice sulod sa Capitol Compound tungod sa 7.2 magnitude nga linog hinungdan sa pagbalhin niini ngadto sa laing lugar.

Samtang niadtong Septiyembre 30, 2025 napugos na usab sa pagbalhin ang hall of justice human maapektohi sa 6.9 magnitude nga linog ang Qimonda IT Center Building diin gipahimutang ang mga korte.

Gipahinumduman usab sa RDC nga dugay na’ng gidonar sa Cebu City Government ang usa ka luna sa SRP alang sa pagtukod sa permanenteng hall of justice.

Sa mga niaging tuig daghang groundbreaking ceremonies ang nahimo alang sa proyekto apan wala pa gihapon masugdi ang actual nga kaugmaran niini. BDB BANAT NEWS