Alcover nabalaka sa kahimtang sa disaster preparedness

CEBU, Philippines — Nipadayag og kabalaka si Konsehal Pastor “Jun” Alcover, Jr. sa kahimtang sa disaster preparedness sa mga empleyado sa kagamhanan sa Dakbayan sa Sugbo.

Gihisgutan ni Alcover ang nahitabo sa Nationwide Simultaneous Earthquake Drill niadtong Hunyo 19, 2026, diin niapil usab ang mga empleyado sa Cebu City Hall.

Matud ni Alcover nga bisan pa og maayong lakang ang maong drill aron masulayan ang kaandam sa mga empleyado sa panahon sa linog adunay pipila ka mga empleyado nga wala giseryoso ang maong kalihokan.

Gipadayag ni Alcover nga imbes nga itratar nga seryoso ang maong kalihokan apan ang ubang mga empleyado nakita nga casual nga nagpakuha og mga litrato ug giisip ang drill nga usa ka sosyal nga panagtapok imbes nga usa ka bansay-bansay aron nga maluwas ang kinabuhi panahon sa katalagman.

Gitumbok ni Alcover nga ang linog moabot kini nga walay pasidaan kong asa moigo o kanos-a mahitabo.

Gipasabot ni Alcover nga ang tumong sa earthquake drill mao ang pag-andam sa mga tawo sa hustong pagtubag sa emerhensiya.

Apan kong daan nang nahibaw-an sa mga empleyado ang hustong petsa ug oras sa drill mahimong dili na kini epektibong pagsulay sa ilang tinuod nga kaandam.

Ug gumikan niini, gisugyot ni Alcover nga ang umaabot nga mga earthquake drill sa kagamhanan himuon nga walay pagpahibalo sa hustong petsa ug oras sa mga empleyado aron mas makatabang kini sa pagkatinuod nga pagsuway sa preparedness, responsiveness ug disiplina sa mga kawani sa gobiyerno.

Gihangyo ni Alcover ang buhatan ni Mayor Nestor Archival, Sr. pinaagi sa City Disaster Risk Reduction and Management Office (CDRRMO) ug City Administrator’s Office nga ipatuman ang earthquake drill sa mga opisina sa kagamhanan nga dili ipahibalo daan.

Nagtuo si Alcover nga isip mga alagad sa publiko kinahanglan nga mahimong ehemplo ang lokal nga gobiyerno sa pagpalambo sa kultura sa pagkamabinantayon, kahandam ug kalig-on batok sa mga kalamidad. (BANAT NEWS)