Murder isinampa vs 15-anyos shooter
14-anyos lusot sa criminal liability
MANILA, Philippines — Sinampahan na ng patung-patong na reklamo ang 15-anyos na estudyanteng sangkot sa pamamaril sa San Jose National High School sa Tacloban City.
Ayon sa Police Regional Office 8, isinampa ang 3 counts of murder, 3 counts of frustrated murder, at multiple counts of serious physical injuries laban sa 15-anyos na suspek.
Paliwanag ng pulisya, ang 15-anyos lamang ang kinasuhan matapos isagawa ang krimen na may pang-unawa o discernment batay sa isinasaad ng Republic Act 9344 o ang Juvenile Justice and Welfare Act of 2006.
Samantala, walang kasong isinampa laban sa 14-anyos na suspek dahil exempted ito sa criminal liability sa ilalim Juvenile Justice and Welfare Act, nguni’t sasailalim sa intervention program.
Sa resulta ng paraffin test, nagpositibo sa gunpowder nitrates ang kanang kamay ng dalawang menor-de-edad. Nagpositibo rin ang baril na ginamit sa insidente, na nagpapakitang ito ay pinaputok.
Nabatid kay PLtCol. Analiza Armeza, tagapagsalita ng Eastern Visayas police, sa panayam ng ABS-CBN na bago nagpaputok ang dalawang suspek ay tila naghahanap umano ng isang partikular na indibidwal mga estudyante.
Ayon sa imbestigasyon, pumunta muna ang dalawang suspek sa nabanggit na paaralan upang hanapin ang kanilang pakay. Ngunit nang hindi nila ito matagpuan, naglakad umano sila sa pasilyo at nagpaputok sa mga silid-aralan na kanilang nadaanan.
Sinabi ni Armeza na patuloy pang iniimbestigahan kung sino ang tinutukoy na target at kung may kaugnayan ito sa umano’y karanasan ng mga suspek sa pambu-bully.
Kasalukuyang nasa pangangalaga ng City Social Welfare and Development Office ang dalawang menor de edad.
- Latest
