Pagpamusil sud sa eskuylahan

CEBU, Philippines — Usa ka makalilisang nga pagpamusil ang nahitabo sa San Jose National High School sa Barangay San Jose, Tacloban City kagahapon Lunes sa buntag, Hunyo 22, 2026, diin tulo ka estudyante ang namatay ug pito pa ang nasamdan.

Sumala sa mga otoridad, nahitabo ang insidente alas 9:00 sa buntag sulod mismo sa eskwelahan. Ang duha ka suspek, parehong mga estudyante sa maong eskwelahan ug anaa na karon sa kustodiya sa pulisya, nag-edad palang sila og 14 ug 15 anyos. Usa sa mga suspek giingong kanhi  child in conflict with the law (CICL) ug nadakpan dayon sulod sa eskwelahan human sa insidente.

Ang ikaduhang suspek nakadagan unta apan gigukod sa mga tawo hangtud nga nadakpan sa gitagoan niini sa usa ka barangay duol sa lugar.

Sumala sa initial report sa Tacloban City Police Office – Police Station 1, napulo ka indibidwal ang naigo sa bala.

Tulo kanila ang namatay, samtang pito ang nasamdan ug gidala na sa tambalanan.

Sa mga video nga mikatap sa social media, makita ang mga estudyante nga nagkaguliyang, nagsinggit ug naghilak samtang nanago sulod sa classroom samtang madungog ang sunod-sunod nga buto sa armas.

Sa laing mga eksena, makita usab ang pagdinaganay sa mga estudyante ug magtutudlo paggawas sa eskwelahan ang naghilak sa kahadlok.

Usa ka babayeng estudyante usab ang nasamaran ug gidala sa iyang mga kauban gawas sa eskwelahan.

Sumala ni Police Lieutenant Evalyn Diaz, random ang pagpamusil nga gihimo sa duha ka suspek.

 “We are hearing bullying was the motive behind their actions, but we have yet to ask them.” matud ni Diaz.

“We also have yet to establish the sequence of events, they are still in the police station undergoing questioning in the presence of their parents because they are minors,” dugang niini.

Gikumpirma sa kapolisan nga ang .9mm Glock pistol nga gigamit sa usa sa mga suspek service pistol sa usa ka babayeng polis nga nadestino sa Police Regional Office Eastern Visayas.

Sa usa sa mga post sa social media, ang maong suspek naay picture nga tupad sa usa ka policewoman samtang ang bata naay gitak-in nga armas sa iyang hawak.

Giimbestigar karon kun giunsa sa menor de edad pag-access sa maong armas.

Ang ikaduhang armas, usa ka .38 caliber revolver, na-trace sab nga rehistrado sa usa ka private security agency nga nakabase sa Cebu City.

Nakarekober ang mga imbestigador og 40 ka basiyo sa .9mm sa sulod sa classroom sa San Jose National High School diin nahitabo ang pagpamusil niadtong Lunes.

Tungod sa insidente, gisuspenso ang klase sa San Jose Central School ug Manlurip Elementary School.

Sa laing development, ang Department of Social Welfare and Development (DSWD) mipahayag sa ilang pakigbangotan sa mga pamilya sa mga namatay ug sa tanang apektado sa insidente.

“DSWD social workers have provided psychosocial support and psychological first aid to affected individuals to help them cope with trauma, grief, and distress during this difficult period,” matod sa DSWD sa ilang pamahayag samtang nakigkoordinar sila sa Tacloban City LGU.

Gimando sab ni Presidente Ferdinand Marcos Jr. ang paghimo og lawom nga imbestigasyon sa maong trahedya.

“Kinakalungkot ng Pangulo ang pangyayari. Kahit sino pa man lalo na ang mga magulang ng mga nabiktima ay makakaramdam ang lungkot at takot,” sumala ni Palace Press Officer Claire Castro. Samtang ang Department of Education (DepEd) niisip nga “high-alert situation” ang sitwasyon ug padayon ang ilang koordinasyon sa kapolisan ug mga eskwelahan ug gikondenar nila ang nahitabo.

Ang nahitabo kagahapon, tubag ni sa nahitabong pagpanunggab sab sa usa ka estudyante sa laing estudyante sa sulod sa ilang eskuylahan sa Gen. Trias City sa Cavite.

Sa nakalabay sab nga mga adlaw bag-ohay pang gasugod ang klase, naa say pito ka babayeng estudyante ang gidunggab sa laing babayeng estudyante sa usa ka pribadong eskuylahan sa Cavite gihapon.

Sa miaging tuig, naay usa ka babayeng estudyante sab ang gipusil patay sa iyang classmate sa sulod gihapon sa ilang eskuylahan sa Nueva Ecija.

Sa laing bahin, miingon si Cebu City Mayor Nestor Archival nga kinahanglan hatagan og importansya ang seguridad sa mga eskwelahan human sa nahitabo sa Tacloban City. – IBM BANAT NEWS