Umento sa sweldo sa mga JO sa Mandaue giaprobahan

CEBU, Philippines — Ang mga Job Order (JO) employees ug mga personnel sa Clean and Green Program sa Mandaue City posibleng makadawat og umento sa suhulan human giaprubahan sa unang pagbasa sa Mandaue City Council ang duha ka ordinansa nga naglatid sa umento sa ilang sweldo.

Ang mga lakang giaprubahan atol sa regular nga sesyon sa konseho niadtong Lunes, Hunyo 22, aron matabangan ang mga trabahante sa pagsagubang sa nagkataas nga gasto sa panginabuhi ug adlaw-adlaw nga panginahanglanon.

Sa wala pa ang pag-apruba sa unang pagbasa, gisuportahan ni Mandaue City Mayor Thadeo Jovito “Jonkie” Ouano ang gisugyot nga pagtaas sa sweldo isip kabahin sa paningkamot sa lokal nga kagamhanan sa pagpaayo sa kompensasyon sa mga empleyado sa City Hall.

Ang duha ka ordinansa gisulat ni Konsehal Joel Seno, chairman sa Committee on Budget and Finance.

Sa usa ka interbyu, giingon ni Seno nga dugay na kaayong gihulat ang maong pagtaas sa suholan ug dugay na usab kini nga pending. Ang mga JO employees karon makadawat og ?435 matag adlaw. Gisugyot ni Mayor Ouano ang dugang nga ?15 kada adlaw, busa mahimong ?450 na ang ilang suweldo matag adlaw.

Matud ni Seno, bisan parehas og inadlaw nga rate ang tanang JO employees, magkalahi gihapon ang ilang kinatibuk-ang kita depende sa gidaghanon sa adlaw sa ilang pagtrabaho matag bulan. Adunay nagtrabaho og 20 ka adlaw, 24 ka adlaw, ug adunay moabot og 30 ka adlaw matag bulan. Samtang, ang mga personnel sa Clean and Green Program karon makadawat og ?4,500 matag bulan. Gisugyot usab sa mayor ang ?300 nga dugang, nga sweldo og moabot na sa ?4,800 matag buwan.

Bisan pa man og naaprubahan na kini sa unang pagbasa, giingon ni Seno nga naningkamot ang city government nga mapaspasan ang proseso sa lehislasyon aron mahimo kining epektibo sugod Hulyo 1, 2026.

Human sa ilang pag-apruba sa unang pagbasa, ang duha ka gisugyot nga ordinansa gipasaka ngadto sa Committee on Laws ug Committee on Budget and Finance alang sa dugang nga pagtuon ug deliberasyon sa dili pa kini moagi sa ikaduha ug ikatulong pagbasa. MEL BANAT NEWS