Beauty and brain ang gustong ligawan

Dear Dr. Love,

Magandang araw po. Isa po akong college student na kumukuha ng kursong Architecture. Tawagin n’yo na lamang po akong “Archi Boy,” 20 taong gulang mula sa Maynila.

Dr. Love, may isa po akong kaklase na matagal ko nang hinahangaan. Hindi lang dahil maganda siya, kundi napakatalino rin niya. Lagi siyang handa sa klase, mataas ang mga grado, at madalas siyang hinahangaan ng aming mga propesor. Kapag may group projects kami, isa siya sa mga pinakaaasahan.

Ang problema ko po, Dr. Love, nag-aalangan akong ligawan siya. Pakiramdam ko kasi ay hindi ako sapat para sa kanya. Kahit nagsisikap naman ako sa pag-aaral, hindi ako kasing talino niya. Natatakot akong baka kapag nagpahayag ako ng nararamdaman ko ay masira ang magandang samahan namin o baka hindi niya ako seryosohin.

May mga pagkakataon din na iniisip ko na baka mas bagay sa kanya ang mas matalino, mas gwapo, o mas matagumpay na lalaki. Kaya imbes na umamin, pinipili ko na lang na itago ang nararamdaman ko.

Archi Boy

Dear Archi Boy,

Mukhang ma-
syado mong minamaliit ang iyong sarili. Kung nagagawa mong magsikap sa kursong Architecture, hindi ka basta-basta. Alam natin na hindi madali ang kursong pinili mo. Marahil ay nakatuon ka lang sa mga kalakasan ng iyong kaklase kaya hindi mo nakikita ang sarili mong mga katangian.

Huwag kang matakot sa posibilidad ng pagtanggi. Mas mahirap ang habambuhay na pag-iisip ng “paano kaya kung sinubukan ko?” kaysa sa pagharap sa isang tapat na sagot. Kung sakaling hindi pareho ang kanyang nararamdaman, hindi ibig sabihin noon na kulang ka bilang tao. Ibig sabihin lamang ay hindi kayo nakatakda para sa isa’t isa sa ngayon.

DR. LOVE