Aksidente sa CSCR, rider patay

CEBU, Philippines — Patay ang usa ka 18-anyos nga lalaki human maaksidente sa iyang gimanehong motorsiklo sa South Road Properties (SRP) northbound lane atubangan sa NUSTAR kagahapon sa kadlawon, Domingo, Hunyo 21, 2026.

Ang biktima giila nga si Yuri Benjamin Tatoy Gabut, 18, taga Harmonis Residences, Barangay Tabunok, dakbayan sa Talisay, Cebu.

Siya nagmaneho sa usa ka Yamaha Aerox nga motorsiklo nga adunay plaka nga G5F438.

Base sa imbestigasyon sa Traffic Enforcement Unit sa Cebu City Police Office, ang insidente gitaho alas 4:54 sa kadlawon.

Nasayran nga ang biktima nagtadlas Cebu South Coastal Road sa SRP ug mihimo og U-turn duol sa Il Corso sa wala pa mipadayon sa northbound nga bahin sa dalan.

Pag-abot niya sa lugar sa insidente atubangan sa NUSTAR, giingong nawad-an kini og kontrol sa iyang motor.

Sumala sa usa ka security guard sa NUSTAR nga nakasaksi sa panghitabo, kalit nga nawad-an og kontrol ang rider sa iyang motorsiklo ug mibangga.

Tungod sa kusog nga impact sa aksidente, nakaangkon ang biktima og grabeng samad nga maoy hinungdan sa iyang kamatayon.

Gideklarar siyang patay sa mga responders sa ambulansya nga miabot sa lugar. Padayon pa ang imbestigasyon sa kapulisan.—Romeo D. Marantal/IBM

Lalis sa CCTO enforcer ug magtiayon nag-viral

Nag-viral sa Facebook ang usa ka video nga naglalis ang usa ka magtiayong namasahero ug ang usa ka traffic enforcer nga sakop sa Cebu City Transportation Office human matud pa gidakop sila bisan og walay kalapasan diha sa atbang sa Pier 3 niadtong sa alas 6:30 sa buntag sa Martes, Hunyo 16, 2026.

Sa video gikan ni Therisa Ygot, asawa sa drayber sa jeep nga si Ronelo Ygot, gisaysay niini nga gituyo sila og dakop ni David Cabras tungod lang kay nagpakanaog sila og tiguwang nga pasahero ug nagpasakay og laing duha ka pasahero sa lugar. Matud pa niya walay sign board nga “No Loading and Unloading Area” ug “No Stopping” ang lugar nga ilang gihunongan diha sa S. Osmeña Jr. Blvd. ug V. Sotto sa atbang sa Pier 3.

Ang magtiayon nidangop sa Brigada News ug niingon nga naandan na sa mga drayber nga sa maong lugar mo-pickup og mga pasahero ug ang mga pasahero nagdumdom na sab diha para mosakay.

Sa habig ni Cabras, namatikdan niya ang maong jeep nga matud pa nga nagpataka og hunong mao nga iya kini nga gipitohan aron nga moabante kay wala’y gibutang nga jeepney stop.

Gihulagway ni Cabras nga gihimo na sa mga drabyer nga terminal ang maong lugar ug nakabalda na sa dagan sa trapiko.

“Ako sila gipa-abante, wa gyud moabante, pag-abot nila sa akong area, ako sila gipara, nangayo pa ko og katahuran ug gipasabot nga naay kalapasan sa “Loading ang Unloading of Passengers, Not Designated PUJ Stop” kay walay nakabutang nga PUJ stopm” si Cabras miingon.

Giangkon sa magtiayong Ygot nga gi-post nila ang maong video tungod kay gatuo silang dili makatarunganon ang pagdakop ni Cabras kanila.

Matud pa sa magtiayon nga sa 29 ka tuig nga ilang pagpamasahero sa rota nga Labangon paingon sa SM City Cebu, sa maong adlawa pa sila nakasuway nga nakalapas sa balaod nga magpahunong og pasahero diha sa maong lugar.

Atol sa ilang primero nga panag-estorya, si Ygot miingon ngadto kang Cabras nga kung manakop man gani ang mga enforcers, kinahanglan una kini magbutang og sign board sa maong dalan atbang sa Pier 3 aron nga masayod sila kung sayop o sakto ba ang ilang paghunong.

Apan ang duha ka partido niresulta hinuon sa panaglalis kay pulos dili magpalupig sa ilang rason apan naabot gihapon sa punto nga gipangayo ni Cabras ang lisensya, CCTO ID, travel line ug rehistro sa sakyanan ni Ygot.

Apan wala makapakita og CCTO ID si Ygot tungod kay matud pa nga wala na siya nikuha og pagbalik human nga nagpatuman og bag-ong polisiya nga adunay na’y expiration date.

Sa pagpakighinabi ngadto kang Raquel Arce kinsa labaw sa CCTO, ang CCTO ID nalatid kini sa City Ordinance 1605 o "Requiring the Public Utility Vehicle (PUV) Driver to process Driver's ID at CCTO” nga napatuman sukad pa niadtong 1996 ug kinahanglan kini nga iplastar sa wind shield sa ilang gipamenaho nga pampubliko nga sakyanan.

“All PUVs including PUJs and taxis are required to secure CCTO ID every year, it has been observed nga gamay nalang drivers ang ni-follow ani nga ordinance ug kasagaran tungod kay naay mga pending violations ang mga drivers,” suma pa ni Arce.

Sa paglukat og CCTO ID kinahanglan lang niini nga moadto sa buhatan sa CCTO nga naa sa South Road Properties ug magdala og photocopy sa driver's license ug karaan nga Citom ID. Ang wala’y CCTO ID, pamultahon og P1,000.

Matud pa ni Arce nga base ilang rekord, aduna na’y P66,000 nga kinahanglang bayran si Ygot tungod sa mga kalapasan sa mga nangaging mga tuig.

Sa pagdakop ni Cabras kang Ygot niadtong Martes, nipahimangno na kini nga adtoon ang opisina, aron mahusay ang mga bag-ong kalapasan ug adto sab ipahibalo ang iyang yangungo nga magbutang og sign board sa maong dapit ug aron nga makakuha og CCTO ID.

Apan si Ygot miingon nga mas unahon niya ang panginabuhi para sa iyang pamilya.

Nag-viral nga video

Ang video nga gi-upload sa magtiayong Ygot naabot na ngadto kang Cabras. Gipadayag ni Cabras nga igo lamang siya nibuhat sa iyang trabaho ug nisunod lang sa balaod mao nga gipara niya ang jeep sa magtiayon tungod kay aduna kini kalapasan.

“Dili ko mopara kung wala sila’ violation,” suma pa niya.

Apan wala magdahom si Cabras nga mag-abot og balik ang ilang mga dalan sa dihang niadtong Huwebes, Hunyo 18, sa samang takna, gipara na sab niya og balik ang magtiayong Ygot tungod kay wala gihapon kini CCTO ID nga nakaplastada sa atubangan sa jeep.

“Wala ko magdahom nga sila na pud akong masugatan. Wala ko magdahom nga wala man diay ni-settle sa iyang penalty,” suma pa ni Ygot.

Apan giisip sa magtiayon nga kaning pagdakop sa ila og balik, gi-personal sila ni Cabras.

“Una niya approach kay nangita dayon sa CCTO ID? Pwede diay na nga parahon ka og diretso nga wala man sila nag-operation?” matud pa sa drayber.

Makasabot unta si Ygot nga dakpon siya og naa siya’y nahimo nga laing kalapasan gawas nga wala siya’y CCTO ID. Siya midugang nga gihulga siya ni Cabra nga pasakaan og kasong cyber libel tungod kay nibuhi sila og estorya nga nangwarta lang kini.

Dugang pa ni Cabras nga gipakauwawan sab siya sa magtiayon sa Facebook tungod nakuhaan og video ang pagdakop.

Si Arce sa iyang bahin gustong husayon ang kasungian nilang Cabras ug magtiayon apil ang paghusay sa wala pa nila nabayrang kalapasan sa lagda sa trapiko. — /IBM (BANAT NEWS)