Paghimo og geohazard assessment giuyonan sa konseho

CEBU, Philippines — Giaprobahan sa konseho sa Dakbayan sa Sugbo ang resolusyon nga giduso Konsehal Michelle Abella-Cellona nga magpahigayon og komprehensibong geohazard assessment ug disaster risk mitigation sa bukirang bahin ug bukirang barangay sa dakbayan.

Tumong sa maong resolusyon ang pagpalig-on sa pagpangandam batok sa mga katalagman sama sa pagdahili sa yuta, flash flood, soil instability ug uban pang geological hazards nga posibleng makaapekto sa mga komunidad sa bukirang bahin sa Sugbo.

Subay sa Republic Act No. 10121 o ang Philippine Disaster Risk Reduction and Management Act of 2010 ug sa Local Government Code of 1991, giawhag ni Cellona ang Cebu City Disaster Risk Reduction and Management Office, Cebu City Planning and Development Office, Department of Engineering and Public Works, Cebu City Environment and Natural Resources Office, ug uban pang ahensya nga sakop sa pag-atiman sa kinaiyahan sa siyudad nga makigtambayayong sa Department of Environment and Natural Resources (DENR), Mines and Geosciences Bureau (MGB), ug mga barangay aron ipahigayon ang geohazard mapping.

Apil na ang slope stability assessment, drainage evaluation, ug environmental risk assessment sa mga lugar nga delikado sa mga natural nga katalagman.

Gipalig-on usab sa resolusyon ang pagrekomenda sa mga angayan nga lakang aron mapakunhod ang peligro, lakip ang pagtukod og slope protection systems, retaining structures, pagpaayo sa drainage systems, pagbutang og early warning systems ug hazard signage, paghimo og evacuation plans, disaster preparedness programs, environmental rehabilitation, ug community-based resiliency initiatives.

Sumala pa ni Cellona nga ang maong inisyatibo nagtinguha sa pagpanalipod sa kinabuhi ug kabtangan sa mga residente pinaagi sa mas episyenteng hazard monitoring ug pagpalig-on sa kaandam sa siyudad batok sa mga posibleng kalamidad ilabi na karon nga nagsugod na ang ting-uwan. — /MEL (BANAT NEWS)