Lista base sa CBMS wa pa ma enrol sa 4Ps

CEBU, Philippines — Gipatin-aw sa Department of Social Welfare and Development-7 (DSWD-7) nga ang mga pamilya nga naapil sa bag-ong gipagawas nga lista sa posibleng benepisyaryo sa Pantawid Pamilyang Pilipino Program (4Ps) sa Cebu ug Bohol dili pa awtomatikong maapil sa programa.

Matud sa DSWD-7, ang maong listahan nga nailhan isip Set 14D ug 14E naglangkob sa 57,015 ka posibleng household beneficiaries nga giila pinaagi sa Community-Based Monitoring System (CBMS) sa Philippine Statistics Authority (PSA).

Aron masiguro ang transparency, gipamutang sa ahensya ang listahan sa mga barangay hall ug ubang pampublikong lugar, kauban ang giya sa iskedyul sa rehistrasyon, mga kinahanglan nga dokumento, ug proseso sa validation.

Gipasabot sa DSWD-7 nga padayon pa ang evaluation ug validation sa mga household aron masuta kung kwalipikado sa programa, lakip ang pagsusi sa kahimtang sa ekonomiya ug presensya sa mga batang nag-eskwela.

Gipahimangnoan ang mga naapil sa lista nga andamon ang mga kinahanglanon nga dokumento sama sa birth certificate sa mga bata, valid ID sa ginikanan o guardian, school records, ug uban pang pruweba sa kahimtang sa pamilya.

Matud pa sa DSWD-7 nga ang proseso importante aron masiguro nga ang ayuda sa gobyerno moabot ra sa tinuod nga kwalipikado nga benepisyaryo sa 4Ps.

Gidasig usab ang publiko nga motabang sa pagreport sa posibleng dili kwalipikado nga benepisyaryo pinaagi sa ilang lokal nga DSWD 4Ps offices para sa tukmang verification.

Ang 4Ps mao ang national poverty reduction ug human capital investment program sa gobyerno nga naghatag og conditional cash grants sa kabus nga pamilya aron mapalambo ang edukasyon, kahimsog, ug nutrisyon sa mga bata ug mapamenos ang kakabos sa taas nga panahon. — /MEL (BANAT NEWS)