“The Silent Noise” nakadaog sa Global OTT Awards 2026

Ang mystery-thriller series nga “The Silent Noise” sa ABS-CBN Studios ug Prime Video maoy nakaangkon sa Best Asian Content Award sa Global OTT Awards 2026 nga gipahigayon sa South Korea niadtong Hunyo 20.

Gipildi sa serye ang entries gikan sa Thailand, Japan, China, ug Taiwan.

Midawat sa award ang direktor sa serye nga si Onat Diaz.

Matud pa niya, ang maong kadaogan kay usa ka dakong inspirasyon alang sa ilang grupo sa Pilipinas ug nagpamatuod nga ang masaligon ug matinud-anong pagsaysay sa mga istoryang Pilipino makatandog sa viewers sa nagkadaiyang dapit sa kalibotan.

Kini usab ang unang higayon nga nakadaog ang Pilipinas sa Global OTT Awards, ilabina sa kategoryang Best Asian Content.

Samtang, nominado usab ang lead actress nga si Angelica Panganiban sa Best Lead Actor (Female) category, kauban sa mga inilang artista gikan sa South Korea, Japan, ug China.

Ang Global OTT Awards naghatag og pag-ila sa streaming platforms, creators, ug programa sa natad sa drama, variety, ug music pinaagi sa nagkalain-laing kategoriya.

Kauban ni Angelica sa “The Silent Noise” sila Zanjoe Marudo, Mylene Dizon, Zaijian Jaranilla, Mutya Orquia, ug ang child star nga si KD Omalin.