Siyudad sa mandaue hugot ang paglihok batok dengue

CEBU, Philippines —  Gipalig-on sa Mandaue City Health Office (CHO) ang mga paningkamot sa pagpugong sa dengue aron masiguro nga mapugngan ang pagtaas sa kaso atol sa ting-ulan.

Matud ni Assistant City Health Officer Dr. Phyllis Bidon, padayon gihapon ang pagrekord og mga kaso sa dengue karong tuiga apan mas moubos kumpara sa samang panahon sa 2025.

“Aduna gihapon tay mga kaso sa dengue karong tuiga, apan kon itandi sa miaging tuig, mas gamay na,” matud ni Bidon.

Gikan Enero hangtod Hunyo 17, 2026, nakarekord ang siyudad og 198 ka kaso sa dengue—mas moubos kaysa 273 ka kaso sa samang panahon sa miaging tuig. Base sa rekord sa siyudad, miabot sa 520 ang total nga kaso sa dengue niadtong 2025.

Gipasabot ni Bidon nga kasagarang motaas ang kaso sa dengue kon ting-ulan tungod sa pagtigom sa tubig nga mahimong puy-anan sa mga lamok.

Padayon usab nga gipatuman sa CHO ang mga lakang sa vector control aron maminusan ang populasyon sa lamok sa siyudad. Aktibo ang lokal nga kagamhanan sa pag-ila ug pagtangtang sa mga posibleng breeding sites sa lamok aron mapugngan ang pagkatag sa sakit.

“Amo gyudng ginabuhat ang 4S advocacy—Search and destroy; Self-protection; Seek early consultation; ug Support spraying,” matud ni Bidon.

Gipahimangnoan usab niya ang mga ginikanan nga dili maglangan sa pagpangayo og medikal nga tabang kon ang ilang mga anak magsugod og hilanat o magpakita og mga sintomas nga may kalabutan sa dengue.

Samtang niini, padayon ang suporta sa Barangay Task Forces for Dengue ug Dengue Brigades sa 27 ka barangay sa siyudad sa kampanya batok dengue sa lokal nga kagamhanan.

Kabahin sa kampanya sa pagpahibalo, nagpatigayon ang mga Barangay Health Workers (BHWs) sa Barangay Labogon og Dengue Awareness Caravan niadtong Hunyo 20 aron edukahon ang mga residente mahitungod sa sakit ug sa mga paagi sa pagpugong niini.