Planong idonate sa mga anak ang ilang properties

Dear Atty. Divine,

Aduna mi mga properties nga nakapangan kanako ug sa akong bana. Pulos kini titulado nga naglakip sa kalubihan ug basakan. Karon ang akong bana misugyot nga ibalhin ang titulo niini ngadto sa pangalan sa among mga anak. Ang akong pangutana kon mamahimo ba nga among i-transfer ang titulo sa among mga properties ngadto sa pangan sa among mga anak? Sakto ba kining sugot sa akong bana? Daghang salamat. —Loida

Dear Loida,

Mamahimo man nga inyong i-transfer ang titulo sa inyong properties ngadto sa pangan sa inyong mga anak pinaagi sa Deed of Donation. Apan sa dili pa kana ninyo buhaton, mas maayo nga inyong huna-hunaon ang mamahimong legal implications niini. Once mo execute mo og Deed of Donation ang ownership sa maong mga properties mabalhin na ngadto sa inyong mga anak og hayan dili na unya kamo makabuot niini. Kon pananglit magkinahanglan mo og kwarta, dili na sab kamo maka dali-dali sa pagbaligya niini kay dili na man kamo ang tag-iya sa property. Samtang kon modesisyon ang uban ninyong anak nga ibaligya ang property nga nakapangan kanila, wa sab kamoy mahimo kay sila man ang nakapangan sa property. Busa mas maayo nga inyo daang tun-an ang maong sugyot sa dili pa kamo modesisyon. Thank you and God Bless! —Atty. Divine

Alang sa inyong pangutana, palihug lang sa pag-email sa [email protected] og akong tubagon ang inyong pangutana pinaagi sa akong column matag Miyerkules, Sabado og Domingo.