New York nagselebrar sa kalamposan sa Knicks

CEBU, Philippines — Liboan ka mga fans sa New York Knicks ang nagbaha didto sa Manhattan kagahapong adlawa alang sa mabulokon nilang victory parade agi'g seleberasyon sa kalamposan nga ilang natagamtaman sa bag-ohay pang natapos nga 2025-26 NBA season.

Ang New York miulbo sa usa ka masadya nga eksena sa dihang ang Knicks mibisbis sa 53 ka tuig nilang huwaw sa titulo human gipildi ang San Antonio Spurs tangkod semana na ang milabay.

Giorganisa sa grupo ni mayor Zohran Mamdani, ang parada gibantayan og 10,000 ka mga pulis nga maoy labing dako nga puwersa sa usa ka planadong kalihukan didto sa New York.

Nagsugwak na ang lugar nga tan-awanan sa mga tawo tulo ka oras sa wala pa magsugod ang parada timaan sa kahinam sa mga fans nga makita ang ilang mga idolo ug makaduyog sa paghudyaka sa Knicks human milangkat sa una nilang korona sukad niadtong 1973.

Atol sa pormal nga seremonyas sa pagpasidungog sa garbo nilang koponan, si Mamdani mihatag sa Knicks sa simbolikong yawe sa City Hall diin si Grammy winner Alicia Keys mikanta sa "Empire State of Mind", ang smash hit nga iyang gi-rekord uban ni Jay-Z niadtong 2009.

"What a gift it is to be brought together by pure, unfiltered joy," matud pa ni Mamdani.

"For as long as we live, we will remember this feeling of a city together, a city alive, a city overcome by happiness."

Sa iyang bahin, ang 2026 NBA Finals Most Valuable Player nga si Jalen Juson nagpasalamat sa mga fans Knicks sa ilang suporta nga nakahatag kanila og tumang kadasig aron birahon ang dugay na ilang gihandum nga kampiyonato.

"Somehow, some way, I knew we were going to find a way to get this done," dason pa ni Brunson.