80 ka Oponganon nakadawat og livelihood assistance

CEBU, Philippines — Ang City Social Welfare and Development Office sa Dakbayan sa Lapu-Lapu nihatag og livelihood financial assistance ngadto sa 80 ka benepisyaryo gikan sa lain-laing barangay kagahapon diin ang kalihokan gipahigayon diha sa city hall atrium.

Ang kagamhanan sa siyudad nigahin og P400,000 alang sa maong proyekto diin matag usa sa benepisyaryo nakadawat og ?5,000.

Kadaghanan sa mga nakadawat gikan sa mainland barangays nga gilangkuban sa Punta Engaño nga adunay pinakadaghang benepisyaryo, sunod ang Canjulao, Ibo, Basak, Gun-ob, Mactan, Poblacion ug adunay pipila usab gikan sa mga barangay sa Babag, Pajac, ug Pajo.

Si Mayor Ma. Cynthia “Cindi” King-Chan nagkanayon nga ang maong tabang gilaoman nga gamiton sa mga benepisyaryo alang sa panginabuhian o gagmay nga negosyo aron makatabang sa ilang adlaw-adlaw nga kita ug sa mas lig-on nga panginabuhi sa pamilya.

Sa wala pa madawat ang maong ayuda ang mga aplikante niagi sa proseso nga naglakip sa certificate of indigency ug barangay residency, voter’s verification certificate, government-issued ID, application form nga makuha gikan sa CSWDO livelihood unit ug project proposal nga ilang gipasa sa maong buhatan. BDB BANAT NEWS