Ateneo coaching staff ban sa UAAP

MANILA, Philippines — Hindi na muna puwe­de sa anumang kapasidad sa UAAP ang lahat ng coa­ching staff ng Ateneo de Manila University hangga’t hindi pa natatapos ang imbestigasyon sa trahedya sa Aurora na naging dahilan ng pagka­lunod nina Rene Baterbonia at Divine Adili.

Ito ang ipinataw na de­sisyon ng UAAP Board of Trustees kahapon mula sa rekomendasyon ng Board of Managing Di­rec­tors bilang paunang hakbang nito habang naghihintay sa resulta ng pagsisiyasat ng ilang government agencies, ng Ateneo, CHED at ng UAAP.

Epektido agad ang na­turang ban na magsisilbing “preemptive measure that’s adopted even prior to the UAAP season to preserve the integrity of the ongoing inquiry and to ensure full transpa­rency and due process as facts surrounding the in­cident are being carefully examined”, ayon sa UAAP.

Hindi pinangalanan ng UAAP o ng Ateneo kung sino ang mga natu­rang staff na kasama ng nagbitiw na head coach na si Tab Badlwin subalit kung ibabatay sa Immi­gra­tion Lookout Bulletin Order ng Department of Justice ay tatlo pang assistant coaches ang kasama dito.

Ito ay sina Reynaldo Ja­­cinto Jr., Dean Castaño at Sandro Soriano, ha­bang nasa ILBO rin si team manager Epok Quim­po bagama’t wala sa Aurora dahil sa personal na lakad sa ibang bansa.

Tulad ni Baldwin ay nagbitiw din sa puwesto si Quimpo.