Lima ka drug supects nangadakpan

CEBU, Philippines — Lima ka gidudahang drug  personalities lakip ang usa ka High-Value Individual (HVI) ang nadakpan sa sunod-sunod nga anti-illegal drug operations sa barangay Pasil ug Sawang Calero sa Dakbayan sa Sugbo sa gabii sa Hunyo 16, 2026.

Kapin P389,000 nga kantidad sa gidudahang ilegal nga droga ang nakumpiska sa mga operasyon nga gipahigayon sa Station Drug Enforcement Team (SDET) sa Police Station 6 sa Cebu City Police Office (CCPO) ubos sa pagpangulo ni Police Captain Noah Labra Añana, officer-in-charge sa estasyon.

Pinakadako sa mga operasyon ang buy-bust operation nga gihimo sa Police Station 6 uban sa Philippine Drug Enforcement Agency (PDEA)-7 sa Barangay Pasil diin nasikop ang usa ka HVI nga giatubang og kasong paglapas sa Sections 5 ug 11, Article II sa Republic Act 9165 o Comprehensive Dangerous Drugs Act of 2002.

Narekober gikan sa maong suspek ang daghang heat-sealed transparent plastic sachet nga adunay gidudahang shabu nga may kinatibuk-ang gibug-aton nga 55.05 gramos ug Standard Drug Price (SDP) nga P374,340.

Sa laing operasyon sa Barangay Pasil, nasikop usab ang usa ka suspek human makuhaan og usa ka medium-sized nga plastic sachet nga adunay gituohang shabu nga may gibug-aton nga duha ka gramos ug balor nga P13,600.

Samtang sa Barangay Sawang Calero, nasikop sab ang usa ka suspek human makuhaan og gituohang marijuana nga may gibug-aton nga duha ka gramos ug balor nga P480.

Sa laing operasyon usab sa maong barangay, nadakpan ang usa pa ka indibidwal human makuhaan og usa ka plastic sachet nga adunay gituohang shabu.

Sa kinatibuk-an, miabot sa 57.22 gramos ang nakumpiskang gituohang shabu nga adunay kinatibuk-ang SDP nga P389,096.

Nadugang pa niini ang duha ka gramos nga gituohang marijuana nga nagkantidad og P480, nga nagdala sa kinatibuk-ang balor sa nakumpiskang ilegal nga droga ngadto sa P389,576.

Ang tanang nadakpan karon gitanggong sa custodial facility sa Police Station 6 samtang giandam ang pagpasaka sa angayng mga kaso batok kanila sa korte.

Sumala sa CCPO, kabahin ang maong mga operasyon sa padayong kampanya sa kapolisan batok sa ilegal nga droga aron mapadayon ang kalinaw, kahapsay ug kaluwasan sa Dakbayan sa Sugbo. (BANAT NEWS)