SHAABAA Season 29: Batch 2014, 2021 miangkon og luna sa Division C semis

CEBU, Philippines — Ang Batch 2014 ug FADI Batch 2021 mipalagpot sa ilang mga karibal aron pagmartsa ngadto sa Division C semifinals sa Sacred Heart Ateneo Alumni Basketball Athletic Association (SHAABAA) Season 29 didto sa Sacred Heart School-Ateneo de Cebu (SHS-AdC) Magis Eagles Arena sa Barangay Canduman, dakbayan sa Mandaue.

Si Miguel Kwan miharos og 24 puntos, unom ka rebounds, tulo ka assists, ug tulo ka steals samtang si Noriko Benedicto way sipyat sa siyam niya ka itsa apil ang tulo ka 3-pointers dayon na ngadto sa pagkadlit og 21 puntos nga iyang gisukipan og lima ka rebounds ug lima ka five assists sa dihang gitagak sa Batch 2014 ang CHEK Technologies Batch 2025, 128-97.

Miamot si Lucky Ecarma og 16 puntos, upat ka rebounds, ug upat ka assists, si Andrew Vincent Manaloto miposte og double-double nga 13 puntos ug 12 ka rebounds samtang si Adrian Ong mitali sab og 13 puntos uban ang upat ka rebounds, usa ka assist, ug usa ka steal aron bitaron ang Batch 2014 ngadto sa Final Four diin makasangka nila ang BRX Batch 2015.

Sa laing bahin, si Josiah Gideon Villamayor mirehistro og double-double nga 27 puntos ug 14 ka rebounds sa dihang gipabakwit sa Batch 2021 ang Rufrance LPG Batch 2026, 108-71.

Si Rey Marcus Fuentes IV mitampo og 16 puntos, pito ka rebounds, ug duha ka assists samtang si Martin Patrick Dumon mibubo og 15 puntos, lima ka  rebounds, tulo ka assists, ug usa ka steal.

Sila si Brandon Largo ug Renz Joshua Pacquibot nagkumbinar og 21 puntos, 14 ka rebounds, unom ka assists, ug tulo ka steals alang sa Batch 2012, nga magsagubang og malisud nga tahas batok sa defending champion Core+ Batch 2018 sa best-of-three semis.