Judgemental ang mga babaye

Segun sa labing ulahing TransUnion Consumer Pulse Study, nasayran nga ang mga non-essential expenses maoy unang gikunhuran sa mga Pinoy taliwala sa nagkataas nga inflation, nga giubanan pa sa krisis sa Middle East.  Mora’g mga middle class ug mga adunahan ra man tingale ang respondent sa survey. Kay unsa ma’y kunhoran sa mga kabos ug timawa, nga nag-ilaid na man gani sa kalisod?  Makapahinumdum sa resulta sa usa ka survey nga nag-ingon nga mas komportable kuno ang babaye maghubo atubangan sa lalaki kay sa atubangan sa babaye. Ang rason mao nga, “Judgemental kaayo ang mga babaye, samtang ang mga lalake, mapasalamaton ra gyud.”  Atala lagee!

Matinud-anon’g impostor

Duha ka babaye ang nadakpan didto sa Davao City tungod kay nagpatoo sila nga mga opisyal sila sa DPWH Central office ug nagpahigayon og inspection sa mga lugar nga naapektohan sa linog.  Nasakpan ang duruha tungod kay sa dihang nakig-meeting sila sa mga DPWH staff sa regional office, adunay bikil sa ilang mga pamahayag nga nakapaduda sa naulahi. Nakita usab sa ilang ID nga sila kuno, Chairman ug Vice-Chairman, posisyon nga wala sa DPWH.  Adunay mga tawo nga matinud-anon, adunay maayong lake, ug aduna usa’y mga impostor. Apan kining mga nagpaka-aron-ingnon nga mga babaye, maingon nato nga “Matinud-anon ug maayo sila sa ilang pagka-impostor.”  Muleeng!

Dako ang bayranan

Matud pa sa Independente Commodity Intelligence Service (ICIS), ang nagsingabot nga Super El Niño phenomenon mahimong makadugang og ginatos nga kantidad sa atong bayranan sa kuryente ug sa galastohan sa gasul. Komento pa sa akong silingan, “Aay dah, bisan wala pa’y El Niño, dako gihapon ang bayranan kay, tungod sa pamolitika sa kagamhanan, ang working class man maoy gipabayad sa kuryente sa mga sakop sa 4Ps.”  Fezteleern!

Sukol bisan naghilak

Namahayag si Senador Rodante Marcoleta nga magpadayon siya sa iyang paningkamot pag-butyag sa mga binuhat nga giingon’g nalambigit sa anomaloso’ng flood control projects bisan pa man kon siya dakpon ug bilangoon.  Buot tingale ipasabot sa senador nga bisan dili na unya gawasnon ang iyang lawas, dili malakip pagkabilanggo ang iyang hunahuna ug katungod sa pagpadayag.  Makapahinumdum sa tambag sa akong apohan nga, “Kon ma-igo ka sa kinumo sa imong ka-sinumbagay, bisan maghilak ka, sukol lang gyud ug ayaw’g hunong sa pagsumbag.”  Madahaan!

No kape, no duty

Ipahigayon sa Cebu City Disaster Risk Reduction and Management Office (CCDRRMO) ang pagbansay sa mga barangay officials ug responders pinaagi sa usa pagpaubos kanila sa usa ka refresher course kabahin sa earthquake response.  Maanindot kini’ng pagahimoon sa dakbayan kay mabansay na man ang atong mga opisyal ug responders kinsa maoy atong maingon nga fist line of defense panahon sa kalamindad. Matud pa sa palahubog nako’ng silingan, “Aaw, human sa training, dili na pwede mobalibad ang mga tanod pinaagi sa ilang slogan nga, ‘No kape, No duty’.” Pagkatoytoy!