Supply sa tubig sa MCWD mikunhod

CEBU, Philippines — Gipalig-on sa Metropolitan Cebu Water District (MCWD) ang ilang pagpangandam batok sa posibleng epekto sa El Niño o huwaw human nakatala nga adunay inadlaw-adlaw nga pagkunhod sa suplay sa tubig nga milapas sa 16,000 cubic meters.

Gibutyag ni MCWD General Manager John DX Lapid ug Operations Department Manager Edgar Ortega atol sa press conference kagahapon, Hunyo 17, 2026 nga ang kasamtangang produksyon sa ahensya anaa sa 263,941 cubic meters matag adlaw nga ubos sa gibanabana nga panginahanglan nga 280,000 CMD kun diin adunay kuwang nga 16,059 cubic meters matag adlaw nga matandi sa 16 milyones ka litro sa tubig.

Matud pa ni Ortega nga usa sa labing apektadong tinubdan sa tubig karon mao ang Jaclupan Water Facility sa Dakbayan sa Talisay diin mikunhod ang produksyon gikan sa 30,000 ngadto sa 20,000 cubic meters matag adlaw. Lakip sa naapektohan ang Buhisan Dam ug ang bulk water supplier sa Compostela.

Bisan nga adunay kuwang nga suplay, gipasalig ni Lapid nga andam ang MCWD nga magpatuman og mga lakang aron maminusan ang epekto sa posibleng huwaw sama sa rehabilitasyon sa kasamtangang mga tabay, pagpakunhod sa non-revenue water (NRW), ug pagpugong sa dili awtorisadong paggamit sa mga fire hydrant aron malikayan ang pagkawala ug posibleng kontaminasyon sa tubig mainom.

Gipasabot usab ni Lapid nga adunay mga gitakdang metered hydrants alang sa emerhensya ug adunay koordinasyon sa Bureau of Fire Protection aron masiguro nga gamiton lamang kini panahon sa emerhensya.

Naghatag sab og suporta ang MCWD sa mga bukirang barangays nga naglisod sa suplay sa tubig pinaagi sa pag-apod-apod og water containers sa Barangay Guba ug Agsungot, samtang gisusi usab ang pagpakatap og mobile water tanks sa Cambinocot, Paril ug Bonbon.

Padayon sab ang MCWD sa pagpalambo sa bag-ong groundwater projects sa pipila ka pampublikong tunghaan ug pagsulay sa leak-detection system sa Cordova aron mapakunhod ang pagkawala sa tubig ug mapalambo ang pag-monitor sa mga pipeline.

Gihangyo ni Lapid ang publiko nga magtinabangay sa pagdaginot sa tubig aron aduna pa’y mokunsumo ang publiko panahon sa huwaw. (BANAT NEWS)