TNT mipuwersa og game 7

CEBU, Philippines — Si Chris McCullough miwani ni Justin Brownlee sa mainit nilang duwelo sa dihang gipayaka sa TNT Tropang 5G ang Barangay Ginebra, 98-90, aron pagpuwersa og Game 7 sa PBA Season 50 Commissioner’s Cup Finals atubangan sa 22,731 ka fans nga nagpunsisok didto sa Smart Araneta Coliseum niadtong Domingo sa gabii, Hunyo 14. Tabla sa baraha nga 3-3, ang Tropa ug ang Gin Kings mag-abot sa katapusang higayon sa usa ka tinagakay nga duwa alang sa korona karong Miyerkules, Hunyo 17, dito sa SM Mall of Asia Arena sa Pasay City.

Salamat ni McCullough, ang TNT mibuhi pa sa ilang paglaum nga madepensaan ang ilang trono.

Ang kanhi champion import sa San Miguel Beer miharos og 53 puntos ug 22 ka rebounds alang sa TNT.

Iyang nalupigan si Brownlee, nga mipabuto og 52 puntos sa pildirong Ginebra.

Sa dihang miabante ang Ginebra,  80-78, sa sayong bahin sa katapusang kuwarter, si McCullough milansang og duha ka 3-pointers ug usa ka 4-ball aron palabwon og balik ang TNT, 94-86, sa hingpit sa pinal nga 1:52 sa duwa.

Si McCullough nakakuha og dakong suporta gikan nilang Jordan Heading ug RR Pogoy nga nagkumboya'g 32 puntos alang sa TNT.

Sukwahi kini sa pikas kampo kay gawas ni Brownlee, wala nay laing Ginebra player nga nakamugna og double figures.