Tulo patay sa aksidente sa kadalanan sa Cebu City

CEBU, Philippines — Duha ka tawo ang patay sa nahitabong vehicular accident diha sa Cebu South Coastal Road (CSCR) atbang sa Il Corso, Dakbayan sa Sugbo niadtong Sabado sa hapon.

Ang mga biktima giila nga si Bernel Tenebro Navares, hingkod ang panuigon, drayber sa motorsiklo gideklarang patay diha-diha ug ang iyang angkas nga si Krystal Claire Mondares, hingkod usab ang panuigon ang nakabsan usab sa kinabuhi pag-abot ngadto sa tambalanan.

Base sa imbestigasyon sa kapolisan nga ang Ford Raptor nga gimaneho ni John Edryl Bacalangco Tabacon, 23 anyos, residente sa Dakbayan sa Talisay ug ang motorsiklo nga gisakyan sa mga biktima nagbiyahe sa lahing direksiyon.

Ang drayber sa pickup nangangkon nga samtang nagkaduol siya sa intersection iyang namatikdan nga ang motorsiklo kalit nga ni-U-turn ug nisulod sa iyang lane.

Ug nibalhin siya ngadto sa tuo nga lane ug nipreno aron makalikay sa motorsiklo apan nagkabangga gyud sila.

Gikataho nga tungod sa kakusog sa impact natagak sa karsada ang drayber ug angkas sa motorsiklo ug nalagpot ngadto sa 25 metros ang gilay-on gikan sa mga sakyanan nga nagkabangga.

Si Mondares gidala dayon sa mga emergency responder ngadto sa Cebu City Medical Center apan gideklara kini sa doktor nga patay na nga naabot sa maong tambalanan.

Padayon pa ang imbestigasyon sa Cebu City Police sa maong hitabo.

Sa laing bahin, usa ka 76-anyos nga babaye ang namatay human nadasmagi og sakyanan diha sa Lower Bonbonan, Barangay Labangon niining siyudad niadtong Biyernes sa kaadlawon.

Ang biktima giila nga si Ana Garcia, residente sa nahisgutang lugar.

Base sa imbestigasyon sa Traffic Enforcement Unit (TEU) sa Cebu City Police Office nagmaneho si William Ygot Hortizano, 58-anyos sa iyang Toyota Avanza nga adunay plaka nga GBK-6077 paingon sa iyang pinuy-anan dihang nahitabo ang aksidente.

Gikataho nga dihang naabot si Hortizano diha sa Bonbonan Road nabanggaan niini si Garcia ug tungod sa kusog nga impact natumba ang biktima ug naguroy sa sakyanan sulod sa pipila ka metros gikan sa lugar nga nahitabo.

Daling gidala si Garcia ngadto sa Cebu City Medical Center apan gideklara usab kini sa attending physician nga si Dr. Nolie Kristoffer Gabia nga patay na nga naabot sa maong tambalanan. — /BDB (BANAT NEWS)