P9.5milyones nga proyekto tukoron sa Daanbantayan

CEBU, Philippines — Ang mga residente sa lima ka barangay sa Daanbantayan, amihanang Cebu, mangulo sa pagpatuman sa bag-ong mga proyekto sa imprastruktura ug sosyal nga kalamboan ubos sa programa sa gobyerno nga community-driven development, diin ang mga komunidad mismo ang nag-una sa pagplano ug pagdesisyon.

Ang Department of Social Welfare and Development-7 (DSWD-7) ug mga lokal nga opisyal nangu sa groundbreaking ceremonies niadtong Hunyo 3 ug 4 alang sa lima ka KALAHI-CIDSS nga mga proyekto sa kalamboan, nga nakadawat og kinatibuk-ang ?9.5 milyon nga grant. Ang mga proyekto naglakip sa upat ka road concreting sa Barangay Bakhawan, Dalingding, Malbago, ug Talisay, ug ang pagtukod og usa ka school building sa Barangay Carnaza. Gilauman nga makabenepisyo kini sa 648 ka household, sumala sa mga opisyal sa programa.

Ubos sa KKB-CDD (Kapangyarihan at Kaunlaran sa Barangay–Community-Driven Development) nga pamaagi, ang mga residente mismo ang nag-ila, nag-prayoridad, ug motabang sa pagdumala sa mga proyekto sa ilang mga komunidad pinaagi sa participatory planning process.

Sa wala pa ang bag-ong rollout karong tuiga, ang Daanbantayan nakapatuman na og pito ka community subprojects nga nagkantidad og ?8.1 milyon ubos gihapon sa maong programa.

Sa iyang pamulong sa mga seremonya, si DSWD Field Office VII KALAHI-CIDSS Deputy Regional Program Manager Engr. Helen C. Ybañez, nga nagrepresentar ni Regional Director Shalaine Marie S. Lucero, miingon nga ang programa dili lang nagpaayo sa access sa basic services kondili nagpalig-on usab sa partisipasyon sa komunidad ug nagpalambo sa leadership ug governance skills sa mga volunteers.

Si Daanbantayan Mayor Gilbert Arrabis Jr. nipadayag usab og suporta sa programa, nga nagpasabot sa kamahinungdanon sa participatory governance sa pagpili ug pagpatuman sa mga proyekto. — /MEL (BANAT NEWS)