DSWD-7 nakadawat og nasudnong pasidungog
CEBU, Philippines — Ang Department of Social Welfare and Development-7 (DSWD-7) nakadawat og nasyonal nga pasidungog human ang ilang Crisis Intervention Section (CIS) gihimong Best Crisis Intervention Section sa 2025 Program on Awards and Incentives for Service Excellence (PRAISE) National ug Gawad Kabalikat Awards nga gipahigayon niadtong Hunyo 11, 2026, isip kabahin sa ika-75 nga anibersaryo sa ahensya.
Gidayeg ang CIS tungod sa ilang talagsaong performance sa paghatag og paspas ug angay nga tabang sa mga indibidwal ug pamilya nga naa sa krisis, ilabi na kadtong nag-atubang og medical emergencies, kalisod sa pinansyal, ug uban pang dinalian nga panginahanglan.
Matud sa DSWD-7, ang maong pasidungog nagpakita sa padayon nga dedikasyon sa seksyon sa paghatag og dayon nga social welfare interventions ug pagsiguro nga ang mga vulnerable ug disadvantaged sectors sa Central Visayas makadawat sa tukmang tabang.
Gidayeg ni Regional Director Shalaine Marie S. Lucero ang CIS ug uban pang awardees, ug giingon nga ang pasidungog nagrepresentar sa tinuod nga kamahinungdanon sa serbisyo publiko nga may kalooy ug kahusayan.
Gawas sa CIS nga nakadaog og championship, ang DSWD Field Office 7 nakadawat usab og daghang nasyonal nga pasidungog, lakip ang Angel in Red Vest Award ni Atty. Jun T. Eso, ECE; 2nd place sa Best Community-Based Social Worker (Permanent) ni Lairisa B. Ballaso, RSW; ug 2nd place sa Best Division Chief ni Jiah L. Sayson sa Pantawid Pamilyang Pilipino Program (4Ps).
Ang Pantawid Pamilyang Pilipino Program – Regional Program Management Office (RPMO) usab nakakuha og 2nd place sa Honorable and Exemplary Achievements on Anti-Red Tape (HEART) Award.
- Latest
