Mas dako, mas nindot nga Copa Cebu 2026

CEBU, Philippines —  Mas dako ug mas nindot nga Copa Cebu football tournament.

Mao kini ang gipasalig sa mga organizers alang sa ikaduhang edisyon sa tinuig nga torneyo nga gikatakda karong Hunyo 19-21 sa Dynamic Herb-Borromeo Sports Complex.

Walo ka mga kategoriya ang kumbatihan ning higayona, gikan sa Player 7 ngadto sa men’s open.

Si Karl Abella, usa sa mga organizers, nagkanayon nga ang Players 7 ug 9 magsubay na og 8-a-side format.

Samtang ang kompetisyon sa Players 11 ug 13, Boys 15 ug 17 Under ingon mana ng men’s ug women’s open 9-a-side na.

Dugang niini, ang mga duwa kumbatihan na sa mas dako nga field ug taas nga oras gikan sa 15 ngadto na sa 16 ka minuto matag duwa.

Tugotan sab ang open substitutions ug walay offside rules nga ipatuman sa 8-a-side o sa 9-a-side.

Si Jhojo Partosa sa Cebu Regional Football Association (CRFA) mihangop ning maong kausaban.

“That’s good because the Palarong Pambansa is already doing the 8-a-side in the elementary. So this one, ni-transition na ta from 7-a-side to 8-a-side and the higher age-groups from 8 to 9-a-side,” matud pa ni Partosa.

Sa iyang bahin, si Abella nagkanayon nga ila kining gibuhat aron ipakita ang maanindot katuyoan sa Copa Cebu alang sa grassroots development.

“That’s what Copa Cebu is all about. We want to continue developing younger grassroots players while also improving our organizers and the level of competition,” paambit pa ni Abella dayong butyag sa ilang tinguha nga makapasiugda og 11-a-side nga torneyo sa umaabot.

Ang GoTyme Bank, usa sa mga nagpaluyo sa kalihukan, mipadayag sa ilang kahinam sa paglambo sa Copa Cebu.

“As a sponsor, we view this as a direct investment in the community by providing financial tools and helping Cebuano players unlock their financial potential. Football mirrors GoTyme Bank - it’s fast, it rewards those bold enough to take the field, and most importantly, it requires discipline. That’s the kind of institution we are building,” dason pa sa representante sa GoTyme Bank nga si Michael Orio.

Nagpabiling bukas ang rehistrasyon pinaagi sa Copa Cebu Facebook page.