Ginebra titulo ang tirade karong gabii

CEBU, Philippines —  Ang Barangay Ginebra Gin Kings mosuway paglangkat sa gihandum nilang korona sa dihang ilang sangkaon ang TNT Tropang 5G sa Game 6 sa PBA Season 50 Commissioner’s Cup Finals karong adlawa (Domingo, Hunyo 14) didto sa Smart Araneta Coliseum sa dakbayan sa Quezon.

Luyo sa career-high 54 puntos ni three-time Best Import Justin Brownleee, ang Gin Kings mikulit og kulbahiman nga daog, 100-95, sud sa overtime sa Game 5 niadtong Biyernes aron pagposte og 3-2 nga labaw sa best-of-seven series.

Si Brownlee, nga milabni sab og 14 ka rebounds sa impresibo niyang double-double nga salida, mibubo og singko puntos sa dugang oras nga nakapalabaw sa Ginebra og kuwatro puntos, 96-92, sa hingpit sa nahibilin nga 2:10 sa duwa.

“I just wanted to be aggressive for my team,” matud pa ni Brownlee, nga mibuak sa miagi niyang career-best nga 51 puntos nga iyang gibirada batok sa San Miguel Beer sa Governor's Cup sa miaging season. “TNT played very tough and very hard, but we just showed never-say-die.”

Ang Gin Kings nanginahanglan na lang karon og usa ka daog aron sakmiton ang una nilang titulo sa tulo ka tuig. Katapusan silang nakampiyon niadtong 2022-23 PBA Commissioner's Cup.

Ang Ginebra naglaraw nga tapuson na ang serye apan angayan silang mangandam sa usa ka malisud nga away kay seguradong buhaton sa TNT ang tanan kutob sa ilang mahimo aron makaangkon og lain pang kinabuhi.

Kon gikinahanglan, ang Game 7 duwaon karong Mikyerkules, Hunyo 17, didto sa SM Mall of Asia Arena sa siyudad sa Pasay.