Palasyo bumuwelta: VP Sara ‘walang modo’

Sa pagtawag kay Marcos Jr. na walanghiya...

MANILA, Philippines — Binuweltahan ng Palasyo ng Malacañang si Vice President Sara Duterte sa mga pahayag nito na “walanghiya” si Pangulong Ferdinand Marcos Jr.

Ayon kay Palace Press Officer Atty. Claire Castro na –“Ang salitang “walanghiya” ay tamang description hindi sa ­Pangulo kundi sa mga alam nating mamatay tayo, may mga assassin na kinomisyon para pumatay ng kalaban. Gayundin sa mga nanakot ng mga tao sa bar at sa mga gumagawa ng fake news laban sa iba para palitawing sila ang tama at makabayan.”

Puna pa ni Castro kay VP Sara, kapag walang script na binabasa ay walang modo at lumalabas ang totoong anyo.

“Ang Bise Presidente kapag walang script na binabasa, walang modo. Lumalabas ang totoong anyo,” maanghang na payahag ni Castro.

Ang reaksyon ni Castro ay bilang sagot sa binitawang pahayag ng Bise Presidente sa Araw ng Kalayaan na gusto niyang makita ng taumbayan hanggang sa dulo kung gaano “kawalanghiya” si Marcos.